Fjölskyldur í forgang – fram veginn í leikskólamálum

Tæplega 9% íbúa Kópavogsbæjar eru 6 ára og yngri. Það ætti því að koma fæstum á óvart að leikskólamál í bænum verði mikið til umræðu fyrir komandi sveitarstjórnarkosningar. Kópavogur hefur staðið vel að leikskólamálum í bænum og tekist að taka börn fyrr inn í leikskólana en t.d. hjá nágrannasveitarfélaginu Reykjavík og ætla má að þær séu nokkrar fjölskyldurnar í Kópavogi sem horfðu einkum til þessara mála hjá sveitarfélaginu þegar þær ákváðu hvar þær ætluðu að byggja sér líf.

Börnum á leikskólaaldri hefur þó fækkað nokkuð á síðustu árum í bænum, hér um bil í beinu hlutfalli við fjölda leikskólabarna í bænum sem einnig hefur fækkað en í dag eru 12% færri leikskólabörn í bænum en þau voru árið 2014. Af þeirri ástæðu hefur leikskólum bæjarins ekki fjölgað sl. ár. Síðustu tvö ár hefur þróunin snúist við og börnum á leikskólaaldri farið aftur fjölgandi, og því fylgja áskoranir.

Hingað til hefur bænum tekist að innrita börn um 14-15 mánaða aldurinn, en inntökualdurinn fer hækkandi með tilheyrandi flækjustigi fyrir foreldra ungra barna. Það horfir til betri vegar með nýjum Kárnesskóla og nýjum leikskóla við Skólatröð. Eins vinnur bærinn að því að fjölga færanlegum kennslurýmum á lóðum leikskólanna, sem er vel. En öflugir leikskólar verða ekki byggðir með plástrum. Stærsta áskorun sveitarfélaga í leikskólamálum er og verður mönnun leikskólanna, ekki fjöldi bygginga.

Mikilvægasta jafnréttismálið

Ég vil búa í sveitarfélagi sem setur fjölskyldur í forgang. Sveitarfélagi þar sem leikskólapláss er tryggt öllum börnum eftir að fæðingarorlofi lýkur. Örugg dagvistunarúrræði eru eitt öflugasta tólið sem við höfum í baráttunni fyrir jafnrétti á vinnumarkaði og gegn launamun kynjanna en konur taka almennt lengra fæðingarorlof og eru lengur frá vinnu en karlar. Framboð á leikskólaplássum greiðir leið kvenna á vinnumarkaði.

Við fjölskyldan erum hæstánægð með leikskóla dóttur okkar. Starfsfólkið til fyrirmyndar og starfið öflugt. Það er mikilvægt að vita af henni í góðum höndum, en álagið á starfsfólkið hefur verið mikið sökum fáliðunar og ekki hefur covid-19 bætt úr skák. Þetta hefur oft leitt til póstsendinga til foreldra þar sem við erum hvött til að sækja fyrr í leikskólann til að létta undir með þeim, sem er okkur ljúft og skylt að gera þegar við höfum svigrúm til. En þetta getur ekki verið viðvarandi ástand og þess vegna þarf bærinn að stíga inn í og forgangsraða í rekstrinum.

Um leið þarf að auka sveigjanleika gagnvart foreldrum og börnum, öll höfum við ólíkar þarfir, og ólíkan vinnutíma ef út í það er farið. Við getum ekki öll tekið sumarleyfi þegar leikskólinn lokar. Með lengri opnunartíma leikskólanna dreifum við umferð betur innan hverfanna, drögum úr álagspunktum í umferðinni og styttum þar með vinnuviku fólks.

Hjá sjálfstætt starfandi leikskólum er sagan og hefðin

Leikskólar á Íslandi voru framan af einkareknir, reknir af kvenfélögum og verkalýðshreyfingunni. Það er ekki fyrr en á seinni hluta síðustu aldar að það byrjar að breytast. Nýlega lagðist starfsemi einkarekna leikskólans Undraland á Kársnesi af, eftir að stofnendur og stjórnendur leikskólans ákváðu að kalla þetta gott. Það er mikill missir af þessum litla leikskóla með stóra hjartað. Foreldrar barna af leikskólanum bera starfinu þar góða söguna. Starfsmannaveltan lítil og starfsdögum stillt upp þannig að þeir hefðu sem minnst rask á daglega rútínu fólks.

Ég held að það sé skynsamleg leið að skoða eflingu sjálfstætt starfandi leikskóla í Kópavogi. Samkeppni er alltaf af hinu góða. Skólar reknir eftir betri stefnum eru betri söluvara. Hjá sjálfstætt starfandi leikskólum er sagan og hefðin.

Að sama skapi er engin skömm að því að fólk sem sinnir leikskólarekstri af kostgæfni hagnist á því. Með ávísanakerfi þar sem bærinn greiðir með leikskólavist hvers barns er það í höndum foreldranna að ganga úr skugga um að leikskólastarfið sé í lagi. Rekstur gengur iðulega betur þegar stjórnendurnir eiga eitthvað undir því að farið sé vel með fjármuni og góð þjónusta veitt.

Höfundur sækist eftir 2.-3. sæti í prófkjöri Sjálfstæðisflokksins í Kópavogi þann 12. mars nk.