„Ég man varla eftir tónleikunum sökum sjóriðu“

Þjóðhátíð 2022 fer fram með pompi og prakt í Heimaey í lok júlí í ár. Fjölbreytt flóra íslensks tónlistarfólks mun stíga á svið og skemmta gestum en hátíðin er nú haldin í fyrsta skipti frá árinu 2019. Lífið á Vísi tekur hér púlsinn á tónlistarfólkinu og fær nánari innsýn í atriðið þeirra á Þjóðhátíð.

Hvenær fórst þú fyrst á Þjóðhátíð?

Ég fór á mína fyrstu Þjóðhátíð einhvern tímann upp úr 2000 man ekki nákvæmlega hvaða ár er minnir að það hafi verið 2002. Þá vorum við í Írafár að koma fram. 

Mjög skrautleg minning þar sem við fórum með gamla Herjólfi frá Þorlákshöfn og bandið var ansi sjóveikt. Ég man varla eftir tónleikunum sökum sjóriðu.

Hvað finnst þér skemmtilegast við þessa hátíð?

Þjóðhátíð er falleg hátíð og algjör tónlistarveisla. Yfir henni ríkir mikil gleði og fjölskyldustemning í bland við gott partý. Er hægt að biðja um meira?

Við hverju mega hátíðargestir búast þegar þú stígur á svið?

Vonandi bara góðri skemmtun og tónlist beint í æð.

Hvað er uppáhalds Þjóðhátíðarlagið þitt?

Lífið er yndislegt er að verða einhvers konar þjóðsöngur Íslendinga og þykir mér vænt um það. Eins finnst mér Þar sem hjartað slær, lag Halldórs Gunnars og Sverris, sjúklega flott.

Hvernig ætlar þú að undirbúa þig fyrir stóru stundina?

Ég tek Herjólf út í ey um morguninn og ætla að njóta Vestmannaeyja fyrri part dags. Seinniparturinn fer svo í hljóðprufur, æfingar og svo framvegis. 

Ég reyni að hafa dagana frekar rólega þegar ég kem fram en það tekst nú aldeilis ekki alltaf.