Átti hljóðver sem var færiband fyrir vinsælustu tónlistina en gat sjálfur varla klárað eitt lag

Hlaðvarpið nefnist Amatör, líkt og hans fyrsta sólóplata. Í fyrsta þætti hlaðvarpsins ræðir hann lagið Eitur sem kom út á dögunum. Þar má heyra nokkrar útgáfur af laginu og heyra pælingar hans á bak við lagið. Unnsteinn tók nokkur ný lög á Arnarhóli á Menningarnótt og fékk gríðarlega góðar viðtökur. 

Um er að ræða fyrsta íslenska hlaðvarpið sem gefið er út samhliða plötu með þessum hætti. 

„Ég hlusta mikið á hlaðvörp og ég sakna þess líka liggja yfir geisladiskabæklingum og vinyl plötum og lesa um allt fólkið á bakvið tónlistina og gerð plötunnar. Þannig að mér datt í hug að þetta væri sniðug leið til að gefa hlustendum þessa innsýn en á sama tíma að kynna plötuna,“ segir Unnsteinn í samtali við Lífið.

„Ég er aðeins að snúa á tónlistarbransaliðið sem er að reyna ýta öllu tónlistarfólki inn á TikTok til að kynna tónlistina sína. Í grunninn veit ég að ég verð að kynna plötuna mína, ég get ekki bara verið tónlistarmaður á fertugsaldri í fílu yfir því að skilja ekki samfélagsmiðla. Þannig að mér fannst hlaðvarp kjörin leið til að koma plötunni á framfæri, en ég hef líka reynslu af dagskrárgerð, af hverju ekki að samtvinna þetta tvennt.“

Upprunalega áætlunin var sjónvarpsþáttur

Unnsteinn segir að í heimsfaraldrinum hafi hann fengið alls konar styrki til að klára plötuna.

„Einn af styrkjunum sneri að því að gera sjónvarpsþátt til að skyggnast á bakvið tjöldin við gerð plötunnar. Nema hvað að svo endist Covid aðeins lengur en ég hafði vonað og ég þurfti endalaust að fresta tökum á þessum þætti, þannig að ég ákvað það í fyrra sumar að nýta efniviðinn sem ég hafði sankað að mér í að koma þættinum frekar út á hljóðformi,“ útskýrir Unnsteinn. 

„Þannig að á vissan hátt, já, þátturinn er búinn að vera lengi í þróun. En hann kemur núna út í allt annari mynd heldur en var upprunalega áætlunin.“

Tónlistarhlaðvörp eru sífellt að verða meira áberandi erlendis. Björk Guðmundsdóttir tilkynnti líka í vikunni að hún ætli sér að gefa út nýja plötu og hlaðvarp um plötuna. 

„Það er að koma út svo ótrúlega mikið af tónlist á hverjum degi. Fyrir sumum er tónlist neysluvara eða eitthvað til að hafa í bakgrunni á meðan það er að gera eitthvað annað. En svo er líka til fullt af fólki sem vill kafa dýpra ofan í tónlistina og njóta hennar á annan hátt. Og það er fólkið sem vill vonandi hlusta á svona hlaðvörp. Og þannig getur það leyft laginu að lifa aðeins lengur með sér frekar en að það sé bara áberandi í viku á Spotify,“ segir Unnsteinn. 

Eins og áður sagði fjallar fyrsti þátturinn um lagið Eitur. Þáttinn má finna í heild sinni á Spotify og hér á Vísi. Hægt er að hlusta á hann í heild sinni í spilaranum hér fyrir neðan.

„Það eru liðin sex ár frá síðustu tónleikum Retro Stefson. Það er ótrúlega margt búið að gerast á þessum sex árum,“ segir Unnsteinn í byrjun fyrsta þáttar. Hann hefur eignast barn og íbúð, fór eitt ár í Listaháskólann og annað í kvikmyndaskóla í Þýskalandi. Hann stofnaði einnig fyrirtæki, útvarpsstöð og margt fleira. 

„Ég er að reyna láta þessa upptalningu hljóma eins og statusarnir sem flæða yfir Facebook um áramótin þar sem fólk telur upp afrek sín á árinu sem er að líða. Og ég er að nota þessa upptalningu til að gæla við egóið og þá staðreynd að á meðan ég rak og átti hljóðver sem var eins og færiband fyrir vinsælustu tónlist landsins þá gat ég sjálfur varla klárað eitt lag. 

Ég gat hjálpað öllum öðrum að semja, spila og ekki síst hughreysta. En að komast áfram í minni eigin tónlist og lagasmíðum? Það fékk hins vegar að sitja á hakanum. 

Ég er ótrúlega góður í að fresta og láta annað ganga fyrir og. ekki síst og það jafnvel minn mesti hæfileiki og löstur er hvað ég er fáránlega góður í að spá í hlutunum, hugsa. Vandinn við þau okkar sem erum góð í að hugsa, er að við eigum oft erfitt með að gera.“

Í þættinum segir hann hvernig lagið eitur varð til.

„Þetta lag gjörbreytti gangi plötunnar og í raun ferlinu öllu svo mikið að við hentum öllum öðrum lögum af plötunni.“

Unnsteinn segir mikilvægt að kafa aftur í tímann til að skilja lagið. 

„í gegnum margar útgáfur, tilfinningar og meiningar.“

Þetta gerir hann í þáttunum og má þar meðal annars heyra demó sem gerð voru þegar lagið var í mótun. Þáttinn má finna í heild sinni á Spotify og í spilaranum ofar í fréttinni.