Stækkuð Ljósleiðaradeild handan við hornið: „Þýðir bara stærri flóra af toppleikmönnum“

Liðunum í Ljósleiðaradeildinni fjölgar um tvö þetta tímabilið og munu því tíu lið keppa um Íslandsmeistaratitilinn í stað átta eins og hefur verið seinustu ár.

Liðin tíu sem spila í Ljósleiðaradeildinni á tímabilinu eru: Dusty, Þór, Ármann, Fylkir, Ten5ion, Breiðablik, LAVA, SAGA, Viðstöðu og NÚ.

Tímabilið hefst sem áður segir næstkomandi þriðjudag, þann 13. september, og deildarkeppninni lýkur þann 16. febrúar á næsta ári. Að deildarkeppninni lokinni taka Meistaramótin svo við, en þau fara fram á tímabilinu 19. febrúar-25. mars.

Ekki nóg með það heldur er íslenska Blast umspilið orðinn hluti af dagskránni sem er kominn til að vera og fer það fram dagana 13.-26. nóvember.

Liðum fjölgar úr 8 í 10 í efstu deild Ljósleiðaradeildarinnar.

Tímabilið byrjar 13 september. Deildarkeppni lýkur 16. febrúar. Meistaramótin fara svo fram á tímabilinu 19. febrúar - 25. mars (sjá mynd í viðhengi).

Alla jafna verður leikið á þriðjudögum og fimmtudögum í allan vetur, en einnig verða spilaðir tveir svokallaðir Ofur-laugardagar þar sem heil umferð fer fram. Fyrri Ofur-laugardagurinn verður þann 15. október og sá síðari þann 21. janúar, en á myndinni hér fyrir neðan má sjá leikjadagskrá vetursins.

Íslandsmeistarinn mætir með nýtt lið

Eitt af nýju liðunum sem kemur inn í Ljósleiðaradeildina á komandi tímabili er liðið NÚ. Meðal leikmanna liðsins er Barni, sem varð Íslandsmeistari með Dusty á seinasta tímabili, en hann mætir nú með ungt lið sér við hlið til leiks.

„Þetta leggst bara mjög vel í mig. Ég er með mjög ungum strákum sem eru að bæta sig mjög mikið bara með hverjum degi,“ sagði Bjarni þegar Vísir náði tali af honum fyrr í dag.

„Ég er ekki búinn að staðfesta það en ég held að við séum yngsta liðið í deildinni. Allir nema einn eru mjög óreyndir þannig það þarf kannski að taka það inn í reikninginn líka. En annars er ég bara mjög spenntur.“

Þá segir Bjarni að liðið hafi fengið nokkuð góðan tíma til að æfa saman í sumar, en þó megi alltaf gera betur.

„Já, maður vildi auðvitað alltaf vilja hafa meiri, en við erum búnir að ná að æfa alveg slatta.“

Verandi ríkjandi Íslandsmeistari segist Bjarni einnig finna fyrir talsverðri ábyrgð þegar kemur að nýja liðinu.

„Já já, ég finn alveg fyrir talsverðri ábyrgð og þetta er bara mjög spennandi. Þetta er nýtt umhverfi. Ég held að það að ég hafi farið úr Dusty hafi bara verið jákvætt fyrir alla hlutaðeigandi.“

Hann gerir sér þó grein fyrir því að hjá nýja liðinu séu ekki miklar líkur á sömu hæðum og hjá Dusty, en hefur trú á því að hann og liðsfélagar hans geti strítt stærri liðum deildarinnar.

„Maður segir auðvitað aldrei að maður sé að fara að tapa öllu. En þessi úrslitakeppni er raunhæft markmið og ég held að það komi bara fljótt í ljós hvernig tímabilið þróast.“

„Ég hef lítið pælt í áhrifum þess að stækka deildina um tvö lið, en það þýðir bara stærri flóra af toppleikmönnum. Þannig að þetta er bara jákvætt held ég,“ sagði Bjarni að lokum.