Missir sig þegar kemur að lakkrís og öllu með lakkrísbragði

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Klukkan hringir klukkan sjö. En þar sem ég er mikil A manneskja þá er ég oftast vöknuð áður en hún hringir.“

Hvað er það fyrsta sem þú gerir á morgnana?

„Fyrsta sem ég geri er oftast að grípa símann og fara yfir helstu fréttir og daginn framundan. Mér finnst gott að taka aðeins stöðuna á fundum og verkefnum sem bíða og undirbúa mig þannig fyrir daginn. Svo er að búa um rúmið og henda sér í sturtu.

Stundum þarf að semja um sturtuna við unglingana á heimilinu og þá reynir á samningatæknina.

Oft getur verið mikill hamagangur á heimilinu á morgnana þar sem allir eru að fara af stað á sama tíma. Svo er hundur á heimilinu sem þarf að fara með í morgungöngu og köttur sem þarf mikla athygli á morgnana. En þetta gengur nú oftast stórslysalaust fyrir sig og allir mæta á réttum tíma í vinnu og skóla.“

Syndir og svindl: Hvaða freistingu ertu líklegust til að falla alltaf fyrir þótt freistingin teljist óholl?

Úff! Ég er almennt mjög öguð og ef ég ákveð að borða ekki eitthvað þá stend ég við það nema þegar lakkrís er annars vegar. Ég stenst hann bara ekki. 

Ég elska allan lakkrís og allt með lakkrísbragði. Súkkulaði með lakkrís, ís með lakkrís, kökur með lakkrís og bara allt með lakkrís. Ætli þetta geri mig ekki að sönnum Íslendingi? 

Vill samt ekki blanda mér í milliríkjadeilur Íslendinga og Dana um uppruna súkkulaðihúðaða lakkrísins. Læt Guðna forseta um það.“

Í hvaða verkefni ertu að vinna helst í þessa dagana?

„Ég er ný tekin við sem framkvæmdastjóri Alfreðs og þar er nóg af skemmtilegum verkefnum sem ég tekst á við með mínu frábæra samstarfsfólki.

Ég hef verið að koma mér inn í starfsemi fyrirtækisins og hitta og kynnast viðskiptavinum og samstarfsaðilum. Eitt af stóru verkefnunum er að innleiða nýja stefnu og þar á meðal gildin okkar sem eru einfaldleiki, sköpunargleði, hagkvæmni og traust. Þau endurspegla áherslur okkar í allri starfsemi fyrirtækisins.

Alfreð er núna kominn með starfsemi í fjórum löndum og því að byggja upp starfsemi á nýjum mörkuðum fylgja fjölbreytt og skemmtileg verkefni. Hérna heima höfum við líka verið að stækka mikið undanfarið og starfsemin að þróast og breytast. Það kallar á viðbætur í starfsmannahópinn og horfum við þá alveg eins út fyrir landsteinana þar sem við leitumst eftir að ráða hæfasta einstaklinginn í verkefnið en erum ekki endilega að horfa til þess hvar hann er staðsettur. Við viljum skapa sveigjanlegan vinnustað, bjóða upp á fjarvinnu og mæta starfsfólki þar sem það vill vera.

Svo er í þróun mjög spennandi viðbót við fyrirtækið sem er í takt við þá breytingu sem hefur verið að gerast á atvinnumarkaðnum með meiri áhuga fólks á að stjórna tíma sínum sjálft og vera ekki bundið einu fyrirtæki. Tengist gigg hagkerfinu og gæti umbylt því hvernig fólk finnur sér verkefni. Mjög spennandi og eitthvað sem beðið hefur verið eftir.“

Hvernig skipuleggur þú þig í vinnu?

„Ég nota alla þá tækni sem til er til að skipuleggja vinnuna og ekki bara vinnuna heldur lífið utan vinnu líka. Með þrjá krakka, hund og kött þá þarf að skipuleggja og halda utan um margt.

Ég nota skipulagsforrit fyrir bæði vinnuna og persónuleg mál. Ég er með allt í símanum bæði dagbókina, skipulagsforrit og minnismiða og veit ekkert hvar ég á að vera eða hvað ég á að gera ef ég er ekki með hann í hendinni. Ég skrifa niður öll verkefni og allt sem ég þarf að muna og forgangsraða reglulega svo ekkert gleymist.“

Hvenær ferðu að sofa á kvöldin?

„A týpan fer að sjálfsögðu snemma að sofa. Mér finnst gott að fara upp í rúm og lesa aðeins áður en ég sofna. Er oft farin að hugsa um að komast upp í rúm klukkan tíu og háttuð klukkan hálf ellefu. Er svo oftast sofnuð um ellefu.“