Miklar truflanir hafa orðið á flugi frá Keflavík í dag nú þegar þúsundir Íslendinga hyggja á utanlandsferðir fyrir jólin. Ljóst er að ferðaplön margra hafa farið úr skorðum, tímabundið í það minnsta.
Gular og appelsínugular viðvaranir eru í gildi um stóran hluta landsins og vegir víða lokaðir.
Þá kom upp bilun í Hellisheiðarvirkjun í morgun sem veldur því að sundlaugar borgarinnar verða lokaðar í dag en vonast er eftir því að viðgerð klárist í dag.
Einnig fjöllum við um COP15 ráðstefnuna þar sem tímamótasamkomulag náðist um helgina. Framkvæmdastjóri Landverndar gagnrýnir þó íslensk stjórnvöld sem hann segir draga lappirnar þegar komi að verndun hafsins.
