Bandarískir alríkissaksóknarar ákærðu Bankman-Fried fyrir fjársvik, peningaþvætti og ólöleg framlög til stjórnmálaframboða í tengslum við gjaldþrot FTX sem var þriðja stærsta rafmyntakauphöll heims. Hann er meðal annars sakaður um að hafa nota milljarða dollara af innistæðum viðskiptavina FTX til þess að halda Alameda Research, vogunarsjóði sínum, á floti.
Fyrr í vikunni féllst Bankman-Fried á að verða framseldur frá Bahamaeyjum, þar sem FTX hafði höfuðstöðvar, til Bandaríkjanna. Hann var fluttur með flugi og lenti í New York í nótt. Breska ríkisútvarpið BBC segir mögulegt að hann komi fyrir dómara í dag. Bankman-Fried, sem er þrítugur, gæti átt yfir höfði sér lífstíðarfangelsi.
Játuðu til að fá mildari refsingu
Staða Bankman-Frieds, sem segist engin svik hafa framið, virðist þrengjast með hverjum deginum sem líður. Saksóknarar upplýstu í gær að tveir nánir samstarfsmenn hans, þau Carolyn Ellison, fyrrverandi forstjóri Alameda Research, og Gary Wang, einn stofnenda FTX, hafi játað sig sek um ýmis konar fjársvik og vinni nú með yfirvöldum.
AP-fréttastofan segir að þau Ellison og Wang hafi skrifað undir játningu gegn því að saksóknarar lofuðu að mæla með því að þau fái mildari refsingu. Ekki hafði verið greint frá því áður að þau væru sökuð um glæp. Ellison, sem er einnig fyrrverandi kærasta Bankman-Frieds, hefði getað átt yfir höfði sér allt að 110 ára fangelsisdóm en Wang fimmtíu ár. Þau ganga bæði laus gegn tryggingu og sæta farbanni.
Verðbréfaeftirlit Bandaríkjanna (SEC) kærði Ellison (28 ára) og Wang (29 ára) fyrir að vera virkir þátttakendur í samsæri Bankman-Frieds um að svíkja fjárfesta og svindla á viðskiptavinum. Wang hafi smíðað hugbúnað sem gerði Bankman-Fried kleift að færa fé viðskiptavina FTX til Alameda Research. Ellison hafi nýtt fjármunina til að fjármagna viðskipti vogunarsjóðsins.
