Hinstu skilaboðin voru þau að hafa áfram gaman

„Svavar Pétur var einstakur listamaður sem hafði mikil áhrif á okkur öll. Hann var alltaf hvetjandi og drífandi. Nennti ekki að velta sér upp úr hlutunum og hafði mikla þörf til að láta galdurinn gerast. Í þessum anda langar okkur að minnast hans og blása í lúðra á afmælisdegi hans,“ segir í fréttatilkynningu frá Hirðinni, sem stendur að tónleikunum.

Kraftur í samvinnunni 

Svavar Pétur féll frá langt um aldur fram síðastliðinn september, eftir tæplega fjögurra ára baráttu við krabbamein. 

„Það voru margir tónlistarmenn sem spiluðu í jarðarförinni og nokkur laga hans voru flutt í einstaklega fallegum útsetningum. Við höfum mikið verið spurð hvort standi til að gera eitthvað meira með þessar útsetningar. 

Það er hins vegar okkar mat að þetta hæfði tilefninu einu saman. Eðli málsins samkvæmt voru þetta mjög þung skref fyrir okkur öll en í öllu þessu ferli og samstarfi fundum við mikinn kraft. Það hjálpaði okkur að hanga saman og rifja upp sögur. 

Þannig að úr varð að við ákváðum að gera þetta aftur en í þetta sinn viljum við fagna lífi hans og gera þetta að hátíð,“ 

segir Berglind. 

Í spilaranum hér að neðan má sjá tónlistarmyndband Prins Póló við lagið Bragðarefir:

Heilandi að rifja upp góða tíma

Í kjölfarið ákváðu þau að afmælisdagur Svavars Péturs yrði auðvitað fyrir valinu og fengu fjöldann allan af tónlistarmönnum til að koma saman.

„Þetta er að sjálfsögðu heljarinnar undirbúningur,“ segir Berglind og bætir við: „Það eru margar hljómsveitir að koma saman og æfa lög eftir hann. Skakkamannage kemur meðal annars fram en það er hljómsveit sem við Svavar vorum í og stofnuðum fljótlega eftir að við byrjuðum saman. Sú hljómsveit hefur ekki komið saman í mörg ár.“

Hún segir þá reynslu sem dæmi mjög kærkomna. 

„Það að hittast, æfa og rifja upp þetta tímabil sem maður hafði kannski ekki hugleitt mjög lengi, þetta er bara svo gaman. Það að hittast og hlæja, það er svo dýrmætt. Það er heilandi að rifja upp góðu tímana.“

Hátt í sextíu tónlistarmenn sem koma saman

Undirbúningur hefur hingað til gengið vel að sögn Berglindar. 

„Þegar við fengum þessa hugmynd þá hentum við bara út netinu til að sjá hverjir vildu vera með og svo bara sögðu allir já. Þannig að þetta varð rosalega stórt en það eru fimmtán bönd og hátt í sextíu tónlistarmenn sem koma að þessu.

Við ákváðum því strax að fá þaulvanan sviðsmann sem hefur unnið á tónlistarhátíðum til að keyra prógrammið, þannig þetta mun vonandi allt renna vel með þremur hléum. Það er líka mikilvægt að taka hlé, hitta fólk og hafa gaman saman.“

Hún segist í skýjunum með dagskrána, en þar eru hljómsveitir sem tengdust Svavari Pétri með einum eða öðrum hætti; sveitir sem hann var í og tónlistarfólk sem hann starfaði með eða vakti aðdáun hans.

„Þetta er náttúrulega geggjað line-up, frábærir tónlistarmenn sem eru að koma saman og flest, ef ekki öll, að fara að taka einhver lög eftir Svavar. Við erum að fara að heyra Prins Póló lög og mögulega eldri lög af hans ferli. Við fáum því að heyra lögin hans í nýjum búningi eftir frábæra listamenn í bland við þeirra eigin lög. 

Þetta verður einstök upplifun sem verður ekki endurtekin. Ég held að þetta verði ógleymanlegt kvöld, fyrir aðdáendur sérstaklega.“

Sjóður algjörlega í hans anda 

Allur ágóði af tónleikunum rennur í nýstofnaðan minningarsjóð Svavars Péturs Eysteinssonar en árlega verður útdeilt úr sjóðnum til skapandi fólks með góðar hugmyndir. 

„Svavar heillaðist ungur af hugmyndafræði pönksins, sem gekk út á að þurfa ekki að vera sérfræðingur í öllu heldur bara láta vaða. Þannig var hann, í tónlist, hönnun, matvælaframleiðslu og fleira. Svo gerðumst við náttúrulega bændur, vorum í ferðaþjónustu og opnuðum tónleikastað á sveitabæ í Berufirði. 

Það var aldrei nein hindrun.“ 

Hún segir að í gegnum tíðina þegar þau voru að sækja um styrki þá hafi umsóknarferlið oft verið langt og flókið. 

„Auðvitað er mikilvægt, sérstaklega þegar verið er að úthluta úr sjóðum ríkisins, að það séu ferlar. En það er líka mikilvægt að einhvers staðar sé svigrúm til að spotta góða hugmynd þegar þú hefur trú á þeim sem standa að baki henni. Að þú sjáir að þarna sé einhver kandídat sem er líklegur til að framkvæma það sem honum dettur í hug. Svavari fannst það eiga að vera nóg. 

Þannig að þessi sjóður á að vera þannig, algjörlega í hans anda. Að spotta góða hugmynd og kýla á hana.“

Vonin mikill drifkraftur

Berglind og Svavar Pétur unnu mikið og náið saman að ýmsum verkefnum. Þegar blaðamaður spyr hana hvernig sé að halda utan um þá arfleifð sem hann skilur eftir segir hún: 

„Ég upplifi þetta sem mikla ábyrgð. Svo hugsar maður líka stundum er partýið búið eða heldur maður áfram? 

En við unnum saman að svo rosalega mörgu þannig það meikar náttúrulega sens að halda áfram með mörg þessi verkefni.   

Þegar að manneskja sem hefur snert svona marga fellur frá finnst mér líka mjög mikilvægt að halda því sem hægt er enn á lofti. Bæði til að minnast hans en líka til að hvetja aðra áfram, eins og pælingin með minningarsjóðinn er. 

Eitt af því síðasta sem hann sagði áður en hann kvaddi var að hvetja okkur til að halda áfram að hafa gaman. Við verðum að verða við því eins og við getum.“ 

Tónleikarnir eru unnir í samstarfi við RÚV og Borg Brugghús og segir Berglind gaman að sjá hversu margir eru til í að leggja þeim lið. 

„RÚV ætlar að gera þessu mjög góð skil og svo er Borg brugghús að gera bjór í tilefni af hátíðinni og þeir leggja pening inn í minningarsjóðinn. Það eru margir sem vilja vera með og það er bara svo þakklátt, það hvetur okkur öll áfram.“

Friðgeir Einarsson og Saga Garðarsdóttir verða kynnar kvöldsins og meðal tónlistaratriða má nefna Árný Margréti, Baggalút, Benna Hemm Hemm, Borko, BSÍ, Dr. Gunna, FM Belfast, Valdimar, Jónas Sigurðsson, Moses Hightower, Múldýrið (DJ sett), Múm, Músíkvatur, Skakkamanage og Snorra Helgason. Hér má finna nánari upplýsingar um tónleikana.