Reykjavíkurborg er eitt þeirra sveitarfélaga sem eftirlitsnefnd með fjármálum sveitarfélaga sendi bréf á dögunum, þar sem gerðar eru athugasemdir við að borgin standist ekki tiltekin lágmarksviðmið í rekstri sínum.
Öllu verri staða er komin upp í Árborg. Í dag var 57 starfsmönnum sveitarfélagsins sagt upp störfum. Eru aðgerðirnar liður í hagræðingu í rekstri. Í ræðu sinni á borgarstjórnarfundi beindi Hildur sjónum sínum að stöðunni í Árborg og bar hana saman við stöðuna í Reykjavík.
„Í Árborg sýnir sveitastjórnin ábyrgð með heiðarlegum viðbrögðum, boðar til íbúafundar og kynnir aðgerðir. Í Reykjavík stígur borgarstjóri fram og segir að allt sé í himnalagi og að borgin standi vel, nema hann sjái langsótt tækifæri til að skella skuldinni á ríkið. Engin viðleitni til að horfast í augu við vandann og bregðast við,“ sagði Hildur sem kvaðst þó sammála því að ríkið þyrfti að koma með virkari hætti að því að fullfjármagna málaflokk fatlaðs fólks.
Sjá einnig: Borgarstjóri: Reykjavík með vaxtaverki en stendur vel
Í ræðu sinni sagðist Hildur óttast að þegar Einar Þorsteinsson, borgarfulltrúi Framsóknar, taki við Degi sem borgarstjóri verði hann titlaður skiptastjóri, en ekki borgarstjóri.
Einar mun taka við af Degi í lok þessa árs.
Áætla níu milljarða viðsnúning
Dagur sagði umrædd bréf eftirlitsnefndar send til margra sveitarfélaga af mörgum ástæðum.
„Og það er býsna óábyrgt af Sjálfstæðisflokknum að tala eins og fyrst og fremst tvö sveitarfélaga hafi fengið slík bréf og af sömu ástæðu. Meginþorri sveitarfélaga á höfuðborgarsvæðinu fengu slík bréf frá eftirlitsnefndinni,“ sagði hann.
Varðandi starfsmannatölur sagði Dagur að stöðugildum hafi fjölgað um 1374 á síðustu fimm árum.
„Langstærsti hópurinn sem fjölgar um er í íbúðakjörnum fyrir fatlað fólk, 389 stöðugildi og 99 prósent fjölgun. Þessi uppbygging er lögáskilin og Reykjavík hefur verið í forystu fyrir.“
Ofan á það bætist við störf innan velferðarkerfis sem hafi fjölgað um 60 manns. Vegna uppbyggingar leikskóla, íbúakjarna og sundlauga hafi því ekki verið hægt en að fjölga starfsfólki, segir Dagur. Hann benti í svari sínu á að fimm ára áætlun hafi verið lögð fram um aðhald og viðsnúning í rekstri borgarinnar.
„Það er níu milljarða viðsnúningur á þessu ári og það gengur ekki að ábyrgt stjórnmálafólk, með öll þessi gögn, tali hér eins og það hafi ekki verið samþykkt fjárhagsáætlun með þessum viðsnúningi,“ sagði Dagur.
60 prósent af heildartekjum til greiðslu launa
Hildur sagðist aðallega hafa gert athugasemd við 13 prósent aukningu á starfsfólki í miðlægri stjórnsýslu.
„Á síðasta kjörtímabili óskaði ég eftir einfaldri útlistun á starfslýsingum þeirra sem starfa innan miðlægrar stjórnsýslu, svarið barst eftir langa mæðu og reyndist 600 blaðsíður. Segir það ekki alla söguna?“, sagði Hildur.
Þá benti hún á að í kynningu KPMG, sem unnin var fyrir Árborg, komi fram að um 58.7% af heildartekjum Árborgar hafi farið til greiðslu launa og launatengdra gjalda árið 2022. Til samanburðar renni um 60% af heildartekjum Reykjavíkur til greiðslu launa og launatengdra gjalda árið 2022.
„Við erum að greiða of hátt hlutfall í launakostnað, hvernig ætlar borgarstjóri að bregðast við því?“
Dagur ítrekaði að aðhald sé í áætlunum borgarinnar en svaraði spurningu Hildar ekki beint heldur gagnrýndi málflutning minni hlutans í umræðunni.
