Það virðast hins vegar vera dökkar hliðar á öllum hitanum. Skógrækt ríkisins óttast að gróðureldar geti brotist út á Austurlandi vegna mikilla þurrka að undanförnu.
Elísabet Inga Sigurðardóttir fréttamaður var í beinni fyrir austan í kvöldfréttum Stöðvar 2 þar sem hún ræddi við bæði erlenda og innlenda ferðamenn og Ingvar Sigurðsson slökkviliðsstjóra:
„Við Sigurjón tökumaður tókum flugið hingað austur í morgun og þegar maður labbaði út úr flugstöðinni mætti manni svona rakt og heitt útlandaloft. Eins og það sem mætir manni á Tenerife,“ sagði Elísabet alsæl með að vera mætt austur.
Fer suður til að kæla sig niður
Ótrúlegt er hversu mikil áhrif veðrið hefur á fólk, segir Elísabet sem fór á stúfana og ræddi við fólk sem baðaði sig í sólinni.
„Þetta var á óskalistanum. Náttúran er dásamleg,“ sagði Neleka Jonson frá Hollandi, spurð hvers vegna hún sé mætt hingað til lands. „Við giftumst fyrir fimmtíu árum en áttum þá ekki pening fyrir brúðkaupsferð þannig þetta er okkar síðari brúðkaupsferð,“ sagði Erik maður hennar sem er feginn að komast í íslensku náttúruna og þurfa ekki að horfa á hana á YouTube.
„Við höfum fíflast með það þegar hitabylgjan var hérna 2021 í sextíu daga, að þá fara menn suður til að kæla sig niður. Það er einmitt það sem ég ætla næstu helgi, ég ætla að kæla mig niður,“ segir Lilja Björnsdóttir, íbúi á Egilsstöðum.
Hafsteinn Elvar og Dagur frá Höfn í Hornafirði eru komnir austur í frí, vel búnir.
Er þetta svipað og Tene?
„Þetta er bara betra, mikið betra. Mikið styttra ferðalag,“ sögðu þeir félagar sem böðuð sig í sólinni.
Hefur ekki þungar áhyggjur
Eins og áður sagði er þurr jarðvegur og bendir slökkvilið á Ausfjörðum á að fara varlega með eld og grill.
„Við búum í miklu kjarrlandi og skógum hér þannig það er mikilvægt að þeir sem heimsækja okkur fari varlega með eld, eins og annars staðar auðvitað,“ sagði Ingvar Sigurðsson slökkviliðsstjóri brunavarna Austur-Húnavatnssýslu.
Það er von á rigningu í næstu viku, dugar það til?
„Ekki miðað við spánna sem ég sá í dag, einhverjir fimm millimetrar, það er ekki að fara að bleyta mikið í þessu,“ sagði Ingvar sem hefur þó ekki þungar áhyggjur af stöðunni enn.
