Fuglinn Larry látinn flakka fyrir X

Nafn fuglsins Larry er tilvísun í Larry Bird, einn besta körfuboltamann allra tíma.

Linda Yaccarino, forstjóri Twitter, tísti um X í gærkvöldi og opinberaði svo vörumerkið í morgun. Musk hefur áður sagt að hann vilji skapa svokallað „ofur-forrit“ og að það eigi að heita X. Hefur hann líkt hugmynd sinni við forrit eins og hið gífurlega vinsæla forrit WeChat í Kína.

Í röð tísta sem hún tísti í gærkvöldi, sagði Yaccarino meðal annars að notendur X ættu að geta notað forritið til að senda skilaboð, hlusta á tónlist, horfa á myndbönd og til að greiða fyrir vörur og þjónustu. Hún sagði að X yrði stýrt af gervigreind og myndi tengja heiminn með leiðum sem við gætum ekki ímyndað okkur enn.

Tíst eiga nú að kallast X, samkvæmt Musk. Á íslensku gæti það að birta tíst kallast „að exa“. Hann segir einnig að hugsa þurfi upp á nýtt hvað það kallast að deila exum annarra, en það hefur kallast að „rítvíta“. Það virðist gefa til kynna að Musk hafi ekki hugsað breytinguna til enda. Hann sagði einnig í nótt að vörumerki X yrði líklega breytt aftur á næstunni.

Á árum áður stofnaði Musk bankaþjónustufyrirtæki sem hét X. com en það varð síðar að PayPal, eftir samruna við annað fyrirtæki. Musk hefur sagt að það að kaupa Twitter gæti fært hann nær upprunalegu sýn hans á X.com.

Eins og frægt er keypti Musk Twitter í fyrra á 44 milljarða dala en það samsvarar tæpum sex billjónum króna, miðað við gengið í dag. Eftir að hann skrifaði undir kaupsamning reyndi Musk ítrekað að komast undan honum og sleppa við kaupin. Hann sakaði stjórn Twitter meðal annars um að hafa ekki útvegað sér gögn sem hann bað um varðandi raunverulegan fjölda falskra reikninga, eða botta, á Twitter.

Við kaupin stigmögnuðust skuldir Twitter og vaxtagreiðslur hækkuðu til muna. Þá hefur Musk sagt upp meira en helmingi starfsmanna fyrirtækisins og hefur hann verið sakaður um að greiða ekki reikninga og leigu, svo eitthvað sé nefnt.

CNN sagði frá því í síðustu viku að starfsmenn Twitter á skrifstofu fyrirtækisins í Afríku hefðu verið reknir eins og svo margir aðrir, þeir hefðu hins vegar ekki fengið neinn uppsagnarfrest greiddan, eins og fyrrverandi starfsmenn í Evrópu og Norður-Ameríku. Fyrirspurnum starfsmanna fyrirtækisins í Afríku hefur ekki verið svarað af núverandi yfirmönnum Twitter.

Þá hleypti Musk notendum sem höfðu verið bannaðir á Twitter aftur þar inn en stjórnun hans á Twitter hefur einkennst af mikilli óreiðu. Auglýsendur drógu úr auglýsingakaupum á Twitter og viðurkenndi Musk nýverið að illa hefði gengið að fá þá til að kaupa auglýsingar þar aftur.

Sjá einnig: Óreiðan virðist ráða ríkjum hjá Twitter

Musk hefur reynt að auka tekjur fyrirtækisins með því að selja áskrift að samfélagsmiðlinum. Hann hefur takmarkað þann fjölda tísta sem fólk getur séð á samfélagsmiðlinum og er einnig verið að takmarka hvað notendur geta sent öðrum notendum mörg skilaboð, svo eitthvað sé nefnt.

Notendur geta komist hjá þessum takmörkunum, flestum, með því að greiða áskriftargjald. Óánægja hefur aukist meðal notenda en nýtt forrit Meta, sem kallast Threads og á að keppa við Twitter varð eitt vinsælasta forrit sem litið hefur dagsins ljós vestanhafs.

Samkvæmt frétt Wall Street Journal er verðmæti Twitter áætlað minna en helmingurinn af því sem Musk borgaði fyrir fyrirtækið á sínum tíma.