Átta grunnskólar tóku þátt á öðru undanúrslitakvöldinu – Árbæjarskóli, Dalskóli, Rimaskóli, Seljaskóli, Landakotsskóli, Víkurskóli, Hólabrekkuskóli og Langholtsskóli. Alls tóku 215 ungmenni þátt í atriðunum í gærkvöldi.
Í úrslit komust Seljaskóli með atriðið Fer þetta svona? og Landakotsskóli með atriðið Á bakvið tjöldin?
Á fyrsta undanúrslitakvöldi Skrekks komust Hagaskóli áfram með atriðið Líttu upp, taktu eftir og Laugalækjarskóli með atriðið Dagurinn hennar mömmu.

Í heildina eru um sjö hundruð þátttakendur í Skrekk í ár en keppnin fer fram í Borgarleikhúsinu.
Undankvöldin eru þrjú og fer það síðasta fram í kvöld. Úrslitin ráðast svo mánudagskvöldið 13. nóvember.
Skrekkur er nú haldinn í 33. sinn en það var Réttarholtsskóli sem bar sigur úr býtum á síðasta ári.