AP fréttaveitan segir það aldrei hafa gerst að forsetaframbjóðandi sem vann bæði Iowa og New Hamsphire, eins og Trump, tryggi sér ekki tilnefningu flokks síns.
Trump veitti Haley þó ekki það rothögg sem hann vonaðist eftir og hún hefur heitið því að berjast áfram í forvalinu en næst fer það fram í Suður-Karólínu, heimaríki hennar, þann 24. febrúar.
Sjá einnig: Trump með öruggan sigur í New Hampshire
Hann hefur verið sífellt harðorðari í garð Haley og hefur meðal annars ýtt undir rasískar samsæriskenningar um að hún sé ekki raunverulega bandarískur ríkisborgari, eins og hann hélt einnig ítrekað fram með Barack Obama á árum áður.
Samkvæmt frétt Reuters var Trump verulega reiður yfir því að Haley hætti ekki þátttöku sinni í forvalinu.
Í nýrri auglýsingu sem birt var í ríkinu í morgun heldur Haley því fram að hún tákni nýjan kafla í sögu Bandaríkjanna. Hún segir Biden og gamlan til að vera forseta og að Trump fylgi of mikil óreiða. Enginn vilji endurtekningu á kosningunum 2020.
Það stefnir þó í endurtekningu á kosningunum 2020.
Kannanir í Suður-Karólínu gefa til kynna að Trump njóti töluverðs forskots á Haley. Ef marka má samantekt tölfræðimiðilsins fivethirtyeight, er Trump með 62,2 prósenta fylgi meðal kjósenda Repúblikanaflokksins í ríkinu en Haley með 25 prósenta fylgi.
Trump er í þeirri stöðu að hann getur varla tapað forvalinu. Hann á sér sterkan grunn kjósenda innan Repúblikanaflokksins og þarf ekki að laða til sín nýja kjósendur. Hann þarf eingöngu að tryggja að sínir stuðningsmenn taki þátt í forvalinu.
Velgengni í forvali ekki ávísun á auðveldar kosningar
Þó sigur Trumps í forvali Repúblikanaflokksins þyki líklegur eru teikn á lofti um að hann gæti átt í erfiðleikum með að sigra Biden í nóvember. Þar á meðal eru þau miklu vandræði sem hann stendur frammi fyrir í dómsölum víðsvegar um Bandaríkin.
Eins og bent er á í frétt AP fréttaveitunnar hefur Trump ekki tryggt sér fylgi frá óháðum kjósendum. Í New Hampshire fékk Haley til að mynda mun meiri stuðning frá fólki sem titlar sig hófsama Repúblikana eða óháðum kjósendum. Hún fékk einnig fleiri atkvæði meðal háskólamenntaðra.
Í frétt Politico segir að Trump hafi í raun eingöngu hlotið náð um 230 þúsund kjósenda í Iowa og New Hampshire og í báðum ríkjum hafi úrslitin verið verri fyrir hann en kannanir höfðu gefið til kynna.
Til að tryggja sér sigur í forsetakosningunum í nóvember þyrfti Trump að tryggja sér stuðning fólks eins og þeirra í Iowa og New Hampshire sem veittu Haley atkvæði þeirra. Í New Hampshire sögðu níu af hverjum tíu sem studdu Haley að þau yrðu ekki sátt við þriðja framboð Trumps. Þá sögðu 84 prósent þeirra að Trump væri óhæfur til embættis forseta, verði hann fundinn sekur um glæp.
Bæði Trump og Biden þurfa að ná til stórra hópa kjósenda sem eru ósáttir við að þessir gömlu menn séu að bjóða sig aftur fram. Trump hefur sýnt að hann á erfitt með að fá fólk á sitt band og sést það ef til vill best á því að hann tapaði kosningunum 2020 og frambjóðendur í þingkosningunum 2022 sem stilltu sér upp með honum, töpuðu í hrönnum.
„Ekki bera mig saman við almættið“
Kosningastjóri Bidens, Julie Chaves Rodriguez, vísaði til fyrri orða Bidens í samtali við blaðamenn í dag um að hann segði að fólk ætti að líta á kosningar sem val.
„Ekki bera mig saman við almættið, berið mig saman við hinn valkostinn,“ hefur Biden sagt.
Rodriguez sagði framboð Trumps snúast um hefnd og að hann ógnaði lýðræði Bandaríkjamanna og frelsi þeirra. Biden og Kamala Harris ætluðu sér að færa Bandaríkin framávið og bæta líf almennings.
