Engir rauðir límmiðar lengur á Iittala

Logo-ið er hannað af Aleksi Tammi. Hann sótti innblástur að gula litnum í brennandi heitan gulan glermassann sem notaður er til að búa til Iittala.

Í yfirlýsingu um vörumerkjabreytinguna [e. Rebranding] á heimasíðu iittala segir að þau vilji sýna alla liti lífsins á gleri og í stað þess að fylgja í fótspor annarra vilji þau fara sínar eigin leiðir.

„Rætur okkar eru í Finnlandi og arfleifð okkar er í handverkshönnun á gleri. Það sem byrjaði sem glerverksmiðja 1881 fagnar nú áratugasögu af hönnun, list og menningu. Við munum alltaf láta þekkinguna sem okkur hefur verið afhent, af hæfileikaríkum hönnuðum okkar og ástríðufulla handverksfólkinu okkar, leiða okkur áfram,“ segir í yfirlýsingunni.

Á sama tíma leyfi arfleifð þeirra og verkkunnátta þeirra þeim að prófa sig áfram, að leika sér og að vera djörf.

„Við bjóðum ykkur því í listrænan hönnunarheim Iittala til að upplifa og finna hönnun sem er hönnuð til að vera elskuð og notað, dag eftir dag.“

Bjuggu til glerhljóðfæri

Í viðtali um málið á vef tímaritsins Wallpaper segir listrænn stjórnandi Iittala, Janni Vepsäläinen, að hún sé hrifin af hæfileikum og þekkingu glerblásarana. „Þú kemst svo nálægt kjarna efnisins og byrjar alveg frá upphafi.“

Vepsäläinen sýndi fyrstu línu sína fyrir merkið á húsgagnasýningu í Stokkhólmi og er sýningunni þar sem línan var sýnd lýst sem allt annað en hefðbundinni. Þar fékk hún listamanninn Damsel Elysium frá London til að sýna og spila og notaði bara gler-hljóðfæri á meðan en öll hljóðfærin voru búin til í verksmiðju Iittala í Helsinki. Áður en hún fór að vinna fyrir Iittala var hún yfirhönnuður í prjónahönnunardeild deild JW Anderson í London en hafði áður starfað fyrir stór tískumerki eins og Givenchy, Alexander McQueen, Simone Rocha og The Row.

Nýtt logo og nýja línan á að hennar sögn að vera virðingarvottur til Aino og Alvar Aalto sem bæði hönnuðu fyrir Iittala. Nýja logo-ið er í letri sem kallað er Aino og er í höfuðið á Aino Aalto, eiginkonu Alvar Aalto en hún hannaði línuna Bölgeblick fyrir Iittala sem hefur lengst af öllum verið í sölu.

„Aino var svo framúrstefnuleg að hún var á jaðrinum að vera eyðileggjandi,“ segir Vepsäläinen í viðtalinu við Wallpaper og að hönnun hennar hafi verið svo blómleg og gyllt að henni hafi liðið eins og hún hafi þurft að brjóta eitthvað. Eftir að yfirmenn hjá Iittala sögðu henni hvaða vörur yrðu næst kynntar, árið 2026, ákvað hún að hrista upp í hlutunum. Hún hafi verið vön að vinna miklu hraðar þar sem hún var áður og kynnti því á húsgagnasýningunni á þessu ári sína fyrstu línu sem heitir Play, eða leikur á íslensku.

Hún segir nafnið koma frá frægu orðatiltæki Alvar Aalto: „Ekki gleyma að leika þér“. Í línunni er að finna litrík glös og diska sem hún segir að eigi að vera hægt að nota við allskonar tilefni. Þá er hún einnig búin að taka klassíska hönnun Iittala Aalto Savou vasann og kynnir hann í nýjum ljósfjólubláum lit. Auk þess eru fuglarnir þrír sem upprunalega voru hannaðir af Oiva Toikka í nýjum pastel-litum.

„Tískumerki hafa verið frábær í því að búa til tilfinningalega tengingu við neytendur og nýja markhópa,“ segir Vepsäläinen í viðtalinu við Wallpaper og að skandinavísk list hafi undanfarið verið föst í listrænu tungumáli sem sé „stjórnað“ eða „stýrt“ [e. Controlled].

„Stundum er fullkomnunarárátta ekki góður stjórnandi. Þú þarft aðeins að sleppa þér. Það er svo margt annað til að skoða. Við þurfum að prófa okkur meira áfram.“