Kosninga­maskína Baldurs ræsir vélarnar

Baldur og Felix - alla leið er nafnið á Facebook-hópi sem telur 6.500 manns nú þegar þetta er skrifað og fjölgar sífellt. Gunnar Helgason, góðvinur hjónanna og hægri helmingur dúettsins Gunni og Felix, fer fyrir hópnum þar sem fólk skorar á Baldur að bjóða sig fram.

Til hópsins var stofnað eftir að hópur fólks hittist á heimili Baldurs og Felix í gærkvöldi til að fara yfir málin og stöðuna. Þangað var komið saman fólk úr ólíkum áttum sem átti það sameiginlegt að geta hugsað sér Baldur sem forseta.

Könnun kynnt fyrir mannskapnum

Þar var meðal annarra mættur Valgeir Magnússon, betur þekktur sem Valli sport, og kynnti hann fyrir hópnum könnun sem hann lét gera en þar var hugur þjóðarinnar til framboðs Baldurs kannaður. 

Í könnuninni er til samanburður við tvo aðra einstaklinga sem nefndir hafa verið sem hugsanlegir frambjóðendur; þau Ólafur Jóhann Ólafsson rithöfundur og forstjóri og Höllu Tómasdóttur forstjóra. Óhætt er að segja að Baldur komi mjög vel út úr þeim samanburði.

„Ástæðan fyrir því að ég gerði þessa könnun núna og einnig fyrir 8 árum var að ég hef persónulega mikinn áhuga á að fá Baldur og Felix á Bessastaði og ég veit að það eru margir með sömu skoðun,“ segir Valli í samtali við Vísi.

Könnunin var lög fyrir í Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðaskrá á netinu. Svarendur eru allstaðar að af landinu 18 ára og eldri. Könnunin fór fram 7. til 13. febrúar 2024 og voru svarendur 967 talsins.

Í könnuninni kemur eitt og annað athyglisvert fram en þjóðin virðist jákvæð gagnvart því að Baldur bjóði sig fram. Niðurstöðurnar eru brotnar niður og kemur til dæmis í ljós að konur eru áfram um að Baldur gefi kost á sér. Sé litið til þess hvaða flokka svarendur styðja eru Miðflokkurinn og Sjálfstæðisflokkurinn, sem er reyndar lítill í könnuninni, eru helst mótfallnir Baldri.

„Báðir eru þeir framúrskarandi menn og væru frábært teymi í þetta mikilvæga starf. Baldur er einn fremsti fræðimaður í heiminum, á sínu sviði, sem er um áhrifa smáríkja.“

Fyrsti yfirlýsti samkynhneigði forsetinn

Valli segir Baldur þekkja stjórnkerfið út og inn, sem skiptir máli, auk þess að koma mjög vel fyrir. Felix, sem undanfarin ár hefur verið helsta sprautan í Eurovision fyrir Íslands hönd, sjónvarpsmaður og rithöfundur, væri „verulega sterkur stuðningur við þau verkefni sem forsetinn þarf að takast á við ásamt því hversu góður hann er í tengslamyndun. Þeir hafa báðir mjög fallega sýn á heiminn og kunna að fá fólk með sér,“ segir Valli. Og hann bætir við, því sem má heita rúsínan í pylsuendanum:

„Til viðbótar þá hefur það hvergi gerst í heiminum að samkynhneigður einstaklingur hefur verð þjóðkjörinn forseti. Það væru góð mannréttindaskilaboð frá Íslandi að það myndi gerast.“

Reyndar er þetta ofsagt hjá Valla, nokkur dæmi eru um samkynhneigða forseta svo sem Edgars Rinkēvičs í Lettlandi en hann er þingkjörinn, Baldur yrði vissulega fyrsti yfirlýst samkynhneigði þjóðkjörni einstaklingurinn á Bessastöðum.

Valli segir að til að fá þetta í samhengi hafi hann valið að láta einnig kanna stuðning við Ólaf Jóhann og Höllu. 

„En þau voru valin þar sem ég taldi líklegt að þau væru að undirbúa framboð. Könnunin er gerð svona þar sem það sýnir best hvaða möguleika fólk hefur á þessum tímapunki að skoða hversu margir eru jákvæðir fyrir framboðinu frekar en hvern það myndi kjósa. Það er ekki hægt að kanna það þegar enginn veit hverjir eru í framboði.“

Eins og áður sagði kynnti Valli könnunina fyrir stuðningsmönnum Baldurs, innsta hring í gær, og var gerður góður rómur af því sem þar kemur fram.

Veraldarvön í kosningum mætt til leiks

Athygli vekur að meðal þeirra sem eru mættir í Facebook-hópinn er fólk sem hefur verið í lykilhlutverki bak við tjöldin í hinum ýmsu kosningabaráttum undanfarin ár. Meðal annars framboð Jóns Atla Benediktssonar til rektors Háskóla Íslands, framboð Guðlaugs Þórs Þórðarsonar hjá Sjálfstæðisflokknum og líklega ber hæst framboð Guðna Th. Jóhannessonar til forseta Íslands fyrir átta árum.

Um er að ræða meðal annars þau Erlu Maríu Tölgyes, Heimir Hannesson, Janus Arn Guðmundsson, Ísak Rúnarsson og Sigurð Helga Birgisson. Erla María og Janus voru á meðal fundargesta í gær. Um er að ræða sannkallaða reynslubolta sem virðast nú vinna í því hörðum höndum að tryggja að Baldur verði næsti forseti Íslands. Það er gulls í gildi að hafa sterkt kosningateymi á bak við sig þegar farið er í baráttuna.

Hvort Baldur fari fram þó líklegur sé er enn óvíst þó það verði að teljast afar líklegt eins og staðan er í dag. Hann var spurður um það síðast í morgun og tók því ekki ólíklega. Hann fylgist með stöðunni og bíður eftir rétta tímanum til að bjóða sig fram, eða ekki. 

Halla Tómasdóttir er á sama stað. Samkvæmt heimildum fréttastofu íhugar Halla alvarlega framboð en hún bauð sig fram gegn Guðna fyrir átta árum og sóttist henni ásmegin eftir því sem á baráttuna leið. Þá liggur Ólafur Jóhann Ólafsson rithöfundur sömuleiðis undir feldi.

Fer Katrín fram eða ekki?

En eftir hverju bíða þremenningarnir? Jú, það skiptir miklu máli að fara fram á réttum tíma og að vita nákvæmlega hvernig landið liggur. Fyrir átta árum kom Guðni fram seint og um síðir eftir að hafa birst í sjónvarpi sem sérstakur greinandi Ríkisútvarpsins. Þannig gæti reynst slæmt að tilkynna framboð og fá svo gríðarlega sterkt mótframboð. Eitt slíkt sem þau þrjú gætu óttast væri framboð Katrínar Jakobsdóttur forsætisráðherra.

Katrín var spurð að því í óundirbúnum fyrirspurnum í gær hvort hún ætlaði í forsetaframboð. Katrín var sérstaklega beðin um að svara spurningunni já eða nei. Það gerði hún ekki.

Katrín kom þá í púlt öðru sinni og svarið var: „Já, herra forseti. Ég hef ekki leitt hugann að slíku framboði enda eru ærin verkefni í forsætisráðuneytinu.“ En heyrst hefur úr herbúðum hennar að um páskana gæti komið fram alvöru framboð og þar beinast sjónir manna að Katrínu.