Minnst 139 létu lífið í árásinni þegar fjórir menn hófu skothríð í tónleikahöllinni og kveiktu þar eld. Lögreglan er sögð hafa verið lengi að bregðast við árásinni og mennirnir komust á brott. Þeir voru handteknir nokkrum klukkustundum síðar.
Pútín varaði við því að fleiri árásir gætu verið gerðar og ýjaði aftur að því að Vesturlönd kæmu mögulega að þeim. Hann nefndi ekki í ávarpi sínu að Bandaríkjamenn hefðu varað við árás og að upplýsingum um mögulegar árásir hefði verið deilt með yfirvöldum í Rússlandi.
Pútín hét fagmannlegri rannsókn á árásinni svo hægt væri að komast að því hverjir högnuðust á henni. Hélt hann því fram að mögulega væri árásin ein af mörgum frá „ný-nasistum“ í Úkraínu, sem hefðu átt í stríði við Rússland frá 2014.
Það ár studdu Rússar aðskilnaðarsinna í Úkraínu með vopnum, peningum og beinni hernaðaraðstoð og gerðu þeir einnig innrás á Krímskaga og innlimuðu hann ólöglega af Úkraínu.
Blaðamaðurinn Kevin Rothrock þýddi hluta ræðu Pútíns á ensku í kvöld.
Just now, in a conference with senior officials, Putin more or less blamed the Ukrainian government for orchestrating Friday s terrorist attack. Speaking more vaguely but with the same accusation, he also placed responsibility on Washington. Here are those comments, subtitled. pic.twitter.com/XPtWomIKZF
— Kevin Rothrock (@KevinRothrock) March 25, 2024
Ráðamenn í Rússlandi hafa frá því fyrir innrás þeirra í Úkraínu 2022 logið því að Úkraínu sé stjórnað af nasistum. Svokölluð „afnasistavæðing“ Úkraínu hefur verið ein af nokkrum uppgefnum ástæðum fyrir innrás Rússa í Úkraínu í febrúar 2022.
Yfirvöld í Rússlandi hafa engar sannanir sýnt sem benda til þess að árásarmennirnir fjórir, sem eru farandverkamenn frá Tadsíkistan, tengist Úkraínu. Þeir eru sagðir hafa verið handteknir á leið að víggirtum landamærum Rússlands og Úkraínu og hefur Pútín haldið því fram að Úkraínumenn hafi ætlað að opna leið fyrir þá inn í landið.
Þegar mennirnir voru handteknir voru þeir pyntaðir. Eyrað var skorið af einum þeirra og því troðið upp í hann. Annar var bundinn og honum gefið raflost í kynfærin. Lögregluþjónar tóku í sumum tilfellum þessar pyntingar upp og birtu myndböndin á netinu.
Sjá einnig: Heita hefndum en freista þess enn að bendla Úkraínu við árásina
Ráðamenn í Úkraínu þvertaka fyrir að hafa komið að árásinni með nokkrum hætti. Ríkismiðlar Rússlands hafa þó ítrekað birt fréttir þar sem því er haldið fram að Úkraínumenn tengist árásinni á einhvern hátt.
ISIS birti myndband sem mennirnir tóku
Íslamska ríkið í Khorasan, sem er angi ISIS sem er virkur í Mið-Asíu og þá helst Afganistan og í Pakistan og Íran, lýsti fljótt yfir ábyrgð á árásinni. Skömmu eftir að yfirlýsingin var birt á netinu var því víða haldið fram á samfélagsmiðlum að yfirlýsingin væri fölsuð, sem hún var ekki.
Í kjölfarið birti fréttaveita ISIS myndefni af árásinni sem árásarmennirnir sjálfir tóku upp.
Þá höfðu yfirvöld í Bandaríkjunum varað við því fyrr í mánuðinum að upplýsingar um að vígamenn ISIS-K ætluðu sér árásir á fjölmenna staði í Moskvu hefðu litið dagsins ljós. Sama dag og sú viðvörun var gefin út lýstu forsvarsmenn leyniþjónustu Rússlands (FSB) því yfir að komið hefði verið í veg fyrir árás vígamanna ISIS á bænahús gyðinga í Moskvu.
Sjá einnig: ISIS lýsir yfir ábyrgð á árásinni í Moskvu
Pútín gagnrýndi þessar viðvaranir í síðustu viku og sakaði Bandaríkjamenn um að reyna að kúga Rússnesku þjóðina.
Sérfræðingur í málefnum Rússlands, sem ræddi við blaðamann New York Times, segir fréttaflutning Rússa um tengingu Úkraínu við árásina líklega ætluðum Rússum en ekki alþjóðasamfélaginu. Umfjöllunin væri pólitísks eðlis.
Áhugasamir geta séð hluta úr mjög vinsælum spjallþætti í Rússlandi sem sýndur var í kvöld. Stjórnendur þáttarins og gestir eru meðal helstu málpípna Kreml.
Pútín hóf nýverið nýtt sex ára kjörtímabil í Rússlandi og hafa fregnir borist af því að hann hafi í kjölfarið ætlað sér að „hreinsa til“ í Rússlandi, tryggja stöðu sína enn frekar og herja á andstæðinga sína innanlands og koma böndum á „elítu“ Rússlands.
Sagði ISIS hafa reynt árásir í Frakklandi
Emmanuel Macron, forseti Frakklands, sagði í dag að sérfræðingar leyniþjónustusamfélags Frakklands hefðu komist að þeirri niðurstöðu að árásin hafi verið gerð af ISIS og sagði að sami angi samtakanna hefði reynt að gera árásir í Frakklandi á undanförnum mánuðum. Hann tók þó ekki fram hvaða anga ISIS-samtakanna hann væri að tala um.
Yfirvöld í Frakklandi hækkuðu viðbúnaðarstig vegna hryðjuverkaógnar í dag.
Vígamenn íslamska ríkisins eru virkir víða um heim. Þeir eru enn virkir í Írak og Sýrlandi, þó kalífadæmi þeirra hafi verið brotið á bak aftur. Þeir eru einnig virkir í Suðaustur-Asíu, Mið-Asíu og í Afríku, svo einhver svæði séu nefnd.
ISIS-K voru stofnuð árið 2015 og hafa vígamenn samtakanna gert fjölmargar mannskæðar árásir síðan þá. Vígamenn samtakanna hafa horn í síðu Rússa og en ISIS-liðar hafa barist við Rússa og/eða málaliða þeirra og bandamenn í Sýrlandi og í Afríku á undanförnum árum. Þá eru Talíbanar miklir fjandmenn ISIS-K og hafa forsvarsmenn samtakanna gagnrýnt Talíbana fyrir náin samskipti þeirra við Rússa.
Rússland hefur einnig oft verið tekið fyrir í áróðri ISIS-K og þá er iðulega vísað í slæma meðferð á múslimum í Mið-Asíu og víðar í gegnum árin.
