Um­fjöllun og við­töl: Haukar - Stjarnan 80-68 | Keira fór á kostum í sigri Hauka

Haukar unnu fyrsta leikinn gegn Stjörnunni í átta liða úrslitum Subway-deildar kvenna. Stjarnan byrjaði betur en Haukar bitu frá sér og unnu síðustu þrjá leikhlutana. 

Það var ekki að sjá á liði Stjörnunnar að liðið hafði enga reynslu í úrslitakeppni Subway-deildarinnar.

Eftir að Keira Robinson, leikmaður Hauka, gerði fyrstu körfu leiksins svöruðu gestirnir úr Garðabæ með níu stigum í röð. Eftir sjö mínútur var Stjarnan tólf stigum yfir 8-20 og þá tók Ingvar Guðjónsson, þjálfari Hauka, leikhlé.

Leikmenn Hauka voru í tómum vandræðum með að setja stig á töfluna og hittu ekki neitt fyrir utan einn leikmann. Keira Robinson gerði öll stigin fyrstu átta og hálfu mínútuna. Keira gerði átta stig á þessum tíma. Stjarnan var fjórtán stigum yfir eftir fyrsta leikhluta 12-26

Í öðrum leikhluta spiluðu Haukar töluvert betri vörn. Eftir að hafa fengið á sig 26 stig í fyrsta leikhluta var kominn tími til að gera betur. Stjarnan gerði aðeins tvö stig á fyrstu sex mínútunum í öðrum leikhluta og það tók liðinu tæplega sjö mínútur að gera körfu úr opnum leik.

Lokasekúndur fyrri hálfleiks voru ansi sérstakar. Í sókn Hauka fékk varamannabekkur liðsins tæknivillu fyrir að biðja um villu.

Katarzyna Trzeciak, leikmaður Stjörnunnar, fékk eitt vítaskot sem hún setti ofan í en síðan kom mikil rekistefna þar sem þrasað var um hver ætti boltann og það voru mikil læti í húsinu. Að lokum fengu Haukar boltann og Keira setti boltann ofan í og fyrri hálfleikur kláraðist. Arnar Guðjónsson, þjálfari Stjörnunnar, var allt annað en sáttur.

Staðan í hálfleik var 34-41.

Eftir að hafa endað fyrri hálfleik vel var augnablikið með Haukum í öðrum leikhluta. Heimakonur áttu ótrúlegan kafla þar sem liðið gerði sjö stig í röð á innan við mínútu. Þegar þriðji leikhluti var hálfnaður neyddist Arnar Guðjónsson til þess að taka leikhlé í stöðunni 50-50.

Eftir leikhlé Arnars tapaði Stjarnan þrisvar boltanum á stuttum tíma og hann neyddist til þess að brenna annað leikhlé tveimur mínútum seinna.

Haukar unnu þriðja leikhluta með sextán stigum 30-14 og voru níu stigum yfir þegar að haldið var í fjórða leikhluta 64-55.

Stjarnan gerði lítið til þess að gefa Haukum leik í fjórða leikhluta og heimakonur unnu að lokum tólf stiga sigur 80-68.

Af hverju unnu Haukar?

Þriðji leikhluti Hauka gekk frá leiknum. Eftir að hafa hitt afar illa í fyrri hálfleik small allt í þriðja leikhluta. Heimakonur unnu þriðja leikhluta með sextán stigum 30-14 og eftir það var aldrei spurning hvort liðið myndi vinna.

Hverjar stóðu upp úr?

Keira Robinson fór á kostum í fyrri hálfleik. Hún var sú eina með lífsmarki í liði Hauka í fyrri hálfleik þar sem hún gerði 18 af 34 stigum liðsins. Keira setti niður stór skot í seinni hálfleik þegar á þurfti að halda og endaði með 26 stig. Hún tók einnig 14 fráköst, gaf 5 stoðsendingar og stal 5 boltum.

Þóra Kristín Jónsdóttir spilaði vel í kvöld. Þóra lét hlutina tikka í þriðja leikhluta þar sem hún gerði 9 af sínum 11 stigum. Þóra tók einnig 6 fráköst og gaf 7 stoðsendingar.

Hvað gekk illa?

Þriðji leikhluti Stjörnunnar kostaði liðið leikinn. Gestirnir réðu illa við pressuna sem Haukar settu á þær og köstuðu boltanum ítrekað frá sér. 

Stjarnan tapaði samanlagt 19 boltum sem var ellefu boltum meira en Haukar töpuðu.

Hvað gerist næst?

Næsti leikur milli liðanna er í Umhyggjuhöllinni næsta laugardag klukkan 19:00.

„Keira var sú eina sem gerði eitthvað í fyrri hálfleik“

Haukar unnu Stjörnuna 80-68 og eru því 1-0 yfir í einvígi liðanna í átta liða úrslitum. Ingvar Guðjónsson, þjálfari Hauka, var ánægður með sigurinn.

„Mér fannst við ekkert spes í öðrum leikhluta en vorum skárri þar en í fyrsta leikhluta. Það kom meira sjálfstraust í sóknarleikinn okkar. Við vorum að skjóta skelfilega í fyrri hálfleik vorum 1/13 í þristum og við vorum að taka slakar ákvarðanir.“

Ingvar var ekki ánægður með sóknarleik Hauka í fyrri hálfleik og viðurkenndi að Keira Robinson hafi haldið sóknarleiknum uppi þar sem hún gerði 18 stig í fyrri hálfleik.

„Það var ekkert í gangi. Keira var sú eina sem var að gera eitthvað í fyrri hálfleik og hún þurfti að taka af skarið sóknarlega. Við vorum hægar og fyrirsjáanlegar og það lenti á henni að ráðast á körfuna. Í seinni hálfleik fengum við fleiri leikmenn sem komu með stig á töfluna og þetta var allt annað hjá okkur.“

Haukar spiluðu töluvert betur í seinni hálfleik og Ingvar var ánægður með liðið sérstaklega í þriðja leikhluta.

„Við spiluðum góða vörn og það voru margar sem stigu upp í seinni hálfleik. Ég var mjög ánægður með þriðja leikhluta og í fjórða leikhluta stýrðum við þessu nokkuð örugglega heim,“ sagði Ingvar Guðjónsson að lokum.