Upphafi mótsins var reyndar seinkað í dag, um tvo og hálfan tíma, vegna rigningar og það gæti haft þau áhrif að ekki takist öllum að ljúka fyrsta hring í dag.
„Völlurinn mun verða blautur í dag en inn í helgina er veðurspáin allt önnur. Það verður bara gaman að sjá hvað gerist í dag,“ segir Sigmundur sem mun lýsa mótinu á Stöð 2 Sport 4. Viðtal við hann má sjá hér að neðan.
Aðspurður hverjir séu líklegastir til að berjast um sigur á mótinu segir Sigmundur:
„Það er náttúrulega Scottie Scheffler, kylfingur númer eitt á heimslista. Það er varla til sú vinnustaðakeppni þar sem Scottie Scheffler er ekki efstur hjá öllum. En svo er líka þarna sigurvegarinn frá því í fyrra, Jon Rahm, en það eru einungis þrír sem hafa varið græna jakkann.
Svo eru fleiri sögur. Viktor Hovland og Brooks Koepka eru þarna uppi, og svo er það stóra sagan um Rory McIlroy sem reynir að sækja stóru slemmuna, að hafa unnið alla fjóra risatitlana. Hann hefur áður átt möguleika og nú kemur í ljós hvort hann fær möguleika á sunnudaginn.“
Fyrir utan þessa kylfinga og fleiri verður einnig fróðlegt að fylgjast með gengi Tiger Woods sem fimm sinnum hefur unnið mótið og klæðst græna jakkanum – síðast árið 2019.
„Það er hrikalega mikil spenna og þetta hefur íslenska golfsumarið. Mánudaginn eftir Masters flykkjast kylfingarnir út og byrja að skoða hvað er í gangi. Það verður hátíð næstu daga,“ segir Sigmundur.
Mastersmótið í golfi verður í beinni á Stöð 2 Sport 4. Útsending frá fyrsta degi hefst klukkan 18.30 í dag en mótið stendur yfir fram á sunnudag.
