Bíllinn leggur meðan ég fæ mér drykk - smart #3 reynslu­akstur

Úti var kalt og dálítið rigningarlegt þegar ég fékk lykilinn í hendurnar og dagskráin framundan samanstóð af Bónusferð, unglingaskutli og hversdagslegum snúningum. Miðaldralífið og allt það. Inni í bílnum var þó hlýtt og notalegt, búið að forhita bílinn gegnum appið og hægt að koma sér virkilega vel fyrir. Ég stillti sætið á alla kanta og vistaði stillingarnar fyrir næstu ferð, greip um hlýtt stýrið og lagði af stað. Á skjánum í mælaborðinu tók ég eftir litlum blettatígri neðst í hægra horninu sem virtist ánægður með ferðalagið.

Lituð lýsing lífgaði upp á rigningardaginn

Hönnunin inni í bílnum er virkilega flott. Innréttingin er sportleg með innbyggðri lýsingu í lit sem hægt er að stilla að vild. Litlýsingin gjörbreytti stemmingunni í bílnum þetta rigningarkvöld. Ekki nóg með að mælaborðið og fótarýmið væri baðað ljósi heldur lýstust einnig upp litlir ferningar í þakglugganum svo það var eins og að horfa upp í ferkantaðan stjörnuhimin. Unglingurinn sem ég var að skutla var yfir sig hrifinn.

Kælir drykkina á leiðinni

Á milli sæta er tvöfaldur glasahaldari sem hægt er að loka, hleðsluhólf fyrir símann sem líka er hægt að loka og rúmgott opið hólf þar undir þar sem tilvalið er að smeygja handtöskunni. Rúsínan í pylsuendanum er þó kælibox milli sætanna. Já, já, það er hægt að halda drykkjunum köldum á langri ferð! smart #3 vann sér inn enn fleiri partýstig og við vorum bara rétt að byrja því nú kveikti ég á útvarpinu.

Mögnuð hljómgæði

smart#3 er búinn BEATS hljómkerfi svo það er óhætt að hækka vel. Ég hækkaði dálítið, og svo dálítið meira og BÚMM!  Fyrir frú sem lækkar venjulega í útvarpinu í bílnum til að geta einbeitt sér að því að finna stæði var þetta alveg ný upplifun. Hljómurinn í bílnum er í einu orði sagt magnaður. Ég skipti snarlega af Gull-bylgjunni yfir á FM957. Ég var farin að finna mig betur og betur í þessu hvítleðraða unglingapartýi. 

Strangur á hámarkshraðanum

smart#3 á þó ekkert skylt við óábyrgan partýungling. Hann er búinn fjölbreyttum akstursaðstoðarkerfum sem eru hluti af Pilot Assist-kerfi Smart, svo sem þjóðvegaaðstoð (HWA) og sjálfvirkri bílastæðaaðstoð (APA), og öryggisfítusarnir í kerfinu eru ýtarlegir. 

Bíllinn pípti til dæmis strax strangur á mig þegar ég fór örfá kílómetra yfir hámarkshraða og ýtti við mér gegnum stýrið ef ég fór of nálægt kantlínum. Og þarna hefðum miðaldra-ég og smart #3 aldeilis átt að ná saman um skynsemisakstur ef BEATS hljómkerfið hefði ekki vakið upp minn innri ungling sem í mótþróakasti hækkaði bara enn meira til að heyra ekki viðvörunarpípið frá hraðamælinum.

Hvernig var annað hægt? Bíllinn er kraftmikill eða 272 kW, frábærlega mjúkur í akstri og liggur lágt eins og sannur sportbíll eða um 16 sentimetra frá götunni.  Hann er líka snöggur upp, ekki nema 5,8 upp í 100. Það var virkilega gaman að spyrna smávegis.

Straumlínulöguð hönnunin hefur loftviðnámsstuðul upp á aðeins 0,27 sem skilar betri akstursupplifun og heildardrægni upp á 455 km. Svo er auðvitað hægt að stilla þessa fítusa til og sníða akstursaðstoðina eins og hentar. Ég stalst til að taka hljóðið af hraðamælinum og þeysti um bæinn með græjurnar í botni. Nú skein sólin á heiðum himni og sólgleraugu nauðsynleg, sem bætti bara stemminguna.

Bíllinn leggur meðan ég fæ mér drykk

Það kom þó að því að ég lækkaði í græjunum því nú þurfti að finna stæði í miðbænum og leggja. Ég ætlaði ekki að gera það sjálf heldur með (APA) bílastæðaaðstoðinni. Ég fann álitlegt pláss inn á milli í bílaröð, sleppti svo stýrinu með hjartað í buxunum og lét bílinn um að smokra sér inn á milli. Það var dálítið taugatrekkjandi að halda ekki um stýrið en ég gat auðvitað bara fengið mér kaldan drykk úr hólfinu á meðan. 

smart #3 rúllaði þessu upp. Mér fannst þetta svo skemmtilegt að ég lét hann leggja aftur og aftur úti um allan bæ, bara upp á grín.

Leiðindasnúningar urðu lúxus

Helgin leið eins og í draumi með smart #3. Hún hófst í rigningarsudda en endaði í glampandi sól. Allir hversdagslegu snúningarnir, Bónusferðin og skutltúrarnir urðu sannkallaðir lúxusrúntar með bleikri lýsingu og bombandi tónlist. Bíllinn stóðst einnig mikilvægt próf því þó unglingnum sem ég var að skutla finndist frábært að geta hækkað í botn vildi hann ekki að það heyrðist út fyrir bílinn hvað við værum að hlusta á. Við gerðum sérstakt tékk á þessu og komumst að því að það heyrðist nánast ekkert í dúndrandi tónlistinni út til gangandi vegfarenda. 

Bíllinn er virkilega þægilegur í akstri og eftir að ég leyfði mér að slökkva á hljóðinu í hámarkshraðamælinum smullum við ljúflega saman. Hann er frábærlega lipur í innanbæjarsnatti og smeygði sér án vandræða í stæði þó hann sé enginn smábíll. 

Allir vegir færir á smart

Hönnunin er flott og bíllinn hefur yfir sér fágað yfirbragð. Akstursupplifunin er einstök og henni hefur verið lýst sem svo að hún vekji upp sterkar tilfinningar. Ég tek undir það. Ég uppgötvaði á mér alveg nýja hlið, langaði í sítt hár og langar neglur, Gucci sólgleraugu og merkjatösku, sem myndi smellpassa í hólfið milli sætanna. Mér fannst mér allir vegir færir á þessum bíl og allt í einu hafði ég beygt upp Bessastaðaafleggjarann án þess að taka eftir því. Ekki að nokkur hafi komið að máli við mig en samt…á þessum bíl.