Viðskipti erlent

Stærstu fyrir­tækin orðið af 747 milljörðum

Eiður Þór Árnason skrifar
Blá villuboð blöstu við farþegum á LaGuardia-flugvelli í New York þegar kerfishrunið þann 19. júlí hafði áhrif á starfsemi flugvallarins.
Blá villuboð blöstu við farþegum á LaGuardia-flugvelli í New York þegar kerfishrunið þann 19. júlí hafði áhrif á starfsemi flugvallarins. AP/Yuki Iwamura

Ein umfangsmesta kerfisbilun sögunnar er talin hafa kostað Fortune 500 fyrirtæki minnst 5,4 milljarða bandaríkjadali, eða um 747 milljarða íslenskra króna. Þetta er mat bandarísks vátryggingafélags.

Alvarleg villa í útbreiddum hugbúnaði netöryggisfyrirtækisins CrowdStrike varð til þess að ótal tölvur og netþjónar hættu að virka þann 19. júlí með þeim afleiðingum að rekstur fyrirtækja truflaðist, flugferðum var aflýst og starfsemi sjúkrahúsa fór úr skorðum.

Fortune 500 listinn samanstendur af 500 stærstu fyrirtækjunum í Bandaríkjunum samkvæmt útreikningum Forbes-tímaritsins. Niðurstaða vátryggingafélagsins Parametrix er því einungis til marks um brot af því fjárhagslega tjóni sem bilunin kann að hafa valdið á heimsvísu.

Fyrirtæki innan bandaríska heilbrigðis- og bankageirans urðu einna verst fyrir barðinu á hugbúnaðarvillunni. Tap heilbrigðisstofnana er metið 1,94 milljarðar bandaríkjadalir og 1,15 milljarðar í tilfelli fjármálastofnana, samkvæmt útreikningum Parametrix. CNN greinir frá þessu.

Einungis lítill hluti tjónsins fæst bættur

Bandarísk flugfélög á borð við United urðu fyrir næstmestum fjárhagslegum áhrifum og félögin sögð hafa tapað samanlagt 860 milljónum bandaríkjadala.

Tölur Parametrix miðast einungis við tapaðar tekjur og hagnað af völdum tölvuhrunsins en tekur ekki til áhrifa minni framleiðni eða þann orðsporsskaða sem rekstrartruflun kann að hafa valdið. Telur vátryggingafélagið að einungis 10 til 20 prósent af tjóni Fortune 500 fyrirtækja falli undir bótavernd netöryggistrygginga.

Glíma enn við áhrif hrunsins

Fjölmörg fyrirtæki nota Falcon, netöryggishugbúnað CrowdStrike til að greina og koma í veg tölvuinnbrot. Þegar CrowdStrike uppfærði hugbúnaðinn í síðustu viku hrundu milljónir tölva um allan heim sem notuðu forritið með Windows-stýrikerfi Microsoft. Beint fjárhagslegt tjón Microsoft er ekki talið með í heildartölu Parametrix þrátt fyrir að það tilheyri Fortune 500-listanum.

Dæmi eru um að fyrirtæki reyni enn að koma rekstri sínum í samt horf eftir kerfisbilunina. Þeirra á meðal er bandaríska flugfélagið Delta Air Lines sem glímir áfram við keðjuverkandi áhrif þess að aflýsa þúsundum flugferða. Bilunin hafði meðal annars áhrif á starfsemi Landsbankans og allra bókasafna hér á landi.

Bandaríkin

Tengdar fréttir

„Við vorum bara eins og blindur köttur“

Flugsamgöngur, greiðslukerfi og sjónvarpsútsendingar lágu niðri þegar algjört hrun varð í tölvukerfum Microsoft í dag. Tekið gæti talsverðan tíma að vinda ofan af afleiðingum bilunarinnar á heimsvísu, sem hafði einnig áhrif á Íslandi. Kerfi Landsbankans, allra bókasafna landsins og húðmeðferðarstofu í Vegmúla lágu niðri um tíma í dag.

Stærsta atvikið í „mörg, mörg ár“

Meiriháttar kerfisbilun hjá Microsoft hefur valdið hruni í tölvukerfum um allan heim, meðal annars á Íslandi, og skapað öngþveiti á flugvöllum og víðar. Lagfæring á biluninni virðist komin vel á veg en áhrifa kann að gæta í einhverja daga. Netöryggissérfræðingur segir um að ræða eina umfangsmestu kerfisbilun síðari ára, sem sýni fram á mikilvægi góðra viðbragðsáætlana.



Mest lesið


Fleiri fréttir

Sjá meira


×

Mest lesið