Fjörutíu blaðamönnum boðið en enginn mætti

Oddur Ævar Gunnarsson skrifar 28. ágúst 2024 15:12

Færri mættu á blaðamannafund Gauta en hann bjóst við.

Emmsjé Gauti hyggst snúa aftur heim í Breiðholt með árlega jólatónleika sína Julevenner. Tónleikarnir munu fara fram í glænýju ÍR heimili í ár og flytjast því frá Háskólabíó þar sem þeir hafa farið fram undanfarin ár. Tónlistarmaðurinn hélt blaðamannafund af þessu tilefni þar sem mæting var dræmari en hann átti von á.

Þetta er meðal þess sem fram kemur í tilkynningu frá tónlistarmanninum. Gauti hefur undanfarin ár slegið í gegn ár hvert með fjölbreyttum hópi listamanna sem kemur fram með honum á jólatónleikum. Í tilkynningu frá Gauta segir að hann hafi boðað til blaðamannafundar í ÍR heimilinu í dag.

„Á fundinn voru um 40 blaðamenn boðaðir en einungis tveir áhugamenn um blaðamennsku mættu á svæðið. Aðalefni fundarins var breyting á jólaskipulagi í Reykjavík. Emmsjé ehf. hefur ákveðið að endurskoða og umbreyta hinni vinsælu jólasýningu Julevenner, sem hefur verið fastur liður í jólahaldinu undanfarin ár. Sýningin, sem hefur verið haldin í Háskólabíó síðastliðin sjö ár, verður nú flutt í ÍR heimilið í Seljahverfi, Breiðholti, þar sem Gauti ólst upp.“

Hugmyndin kom eftir Kviss

Segir að ákvörðunin sé hluti af nýrri stefnu Emmsjé ehf. um að færa jólin nær rótum sínum og skapa nýjan vettvang fyrir þessa ástsælu sýningu. Gauti segir að hugmyndin hafi kviknað eftir að hann tók þátt í spurningaþáttunum Kviss á Stöð 2 fyrir hönd Breiðholtsins.

„ÍR heimilið býður upp á stærri, flottari og gíraðari sýningu sem hentar okkur vel því sýningin gerir ekkert annað en að verða ruglaðari með hverju ári sem líður. Við áttuðum okkur líka á því að með því að færa okkur í Breiðholtið erum við komnir miklu nær flestum hverfum höfuðborgarsvæðisins,“ segir Gauti.

Tónleikarnir fara fram þann 21. desember. Meðal gesta Gauta að þessu sinni verða listamenn á borð við Úlfur Úlfur, GDRN, Patrik, Steinda Jr. og Birgittu Haukdal.

Tónlist Jól