Í tilkynningu frá Borealis Data Center, sem rekur tvö gagnaver á Íslandi og eitt í Finnlandi, segir að með því að leggja slíkar háhraðatengingar neðansjávar verði í framhaldinu hægt að bjóða upp á gagnaversþjónustu fyrir stór verkefni á sviði gervigreindar.
Fyrir er Ísland með þrjá fjarskiptastrengi en sá nýjasti – ÍRIS sem tengir Ísland við Dublin á Írlandi – var tekin í notkun á síðasta ári og jók þá fjarskiptaöryggi landsins um tífalt.
Verkefnið mun stuðla að því að Ísland verði einn af lykilstöðum fyrir háþróaðar gervigreindar- og upplýsingatæknilausnir á alþjóðlegum vettvangi.
Bill Barney, meðstofnandi og stjórnarformaður Modularity, segir að svalt loftslagið á Íslandi bjóði upp á skilvirka kælingu fyrir gagnaver sem dragi verulega úr orkunotkun og kolefnisfótspori slíkra verkefna. „Með því að nýta þessa einstöku kosti má byggja háþróaða gervigreindarmiðstöð á Íslandi verður fyrirmynd á heimsvísu þegar kemur að orkunýtni og sjálfbærni.“
Samstarfið er sagt hafa jákvæð áhrif á þróun stafrænnar tækni og upplýsingatækniinnviða á Íslandi. Þá muni það jafnframt skapa hátæknistörf með háa framleiðni og styrkja samkeppnishæfni Íslands á sviði stafrænnar þjónustu og efla hugverkaiðnað enn frekar sem útflutningstoð.
„Verkefnið mun stuðla að því að Ísland verði einn af lykilstöðum fyrir háþróaðar gervigreindar- og upplýsingatæknilausnir á alþjóðlegum vettvangi og leiða til þess að íslenskur gagnaversiðnaður mun áfram stuðla að útflutningsvexti og tækniþróun á Íslandi,“ segir Björn Brynjúlfsson, forstjóri Borealis Data Center, og einn af hluthöfum félagsins.
Franski fjárfestingasjóðurinn Vauban Infrastructure Partners eignaðist meirihluta í Borealis á árinu 2021 og fer með yfir 90 prósenta hlut.
Í viðtali við Innherja um mitt árið í fyrra kom meðal annars fram í máli Björns að það mætti bæta netsamband Íslands við útlönd.
„Við erum með lágmarkstengingar við umheiminn ef við erum að horfa á netöryggi. Það liggja þrír netstrengir til Evrópu og einn þeirra er kominn til ára sinna. Farice var byggður árið 2002 og er því 21 árs. Það er rafeindabúnaður tengdur við strengina á sjávarbotni sem knýr gagnaflutningana áfram og þessi tækjabúnaður dugar ekki í marga áratugi, það er ljóst.
Netstrengir og öryggi þeirra eru ekki einungis mikilvægir fyrir gagnaver heldur alla starfsemi sem nýtir upplýsingatækni. Það eru líka sóknarfæri í að efla netteningar á milli Evrópu og Bandaríkjanna og við sjáum tækifæri fyrir Ísland til að geti verið nýjan tengipunkt þar á milli og aukið þar með öryggi gagnaflutninga fyrir alla þessa aðila,“ sagði hann.
