Ríkar kröfur gerðar í nýrri aug­lýsingu um sendi­herra­em­bætti

Að sögn Morgunblaðsins mun þetta vera í fyrsta sinn sem staðan er auglýst laus til umsóknar en samkvæmt utanríkisráðuneytinu var auglýsingaskyldu komið á með lagabreytingu sem tók gildi árið 2021.

Samkvæmt auglýsingunni eru sérfræði- og stjórnunarstörf á aðalskrifstofu utanríkisráðuneytisins meðal helstu verkefna og dagleg stjórnun sendiskrifstofu og umsýsla málefna sem undir hana heyra.

Einnig eftirlit með því að reglum og fyrirmælum sé framfylgt og að reksturinn sé innan fjárheimilda.

Þá ber viðkomandi að taka þátt í áætlanagerð, skipulagningu og markmiðasetningu og greina og miðla upplýsingum. Einnig að eiga samskipti og samstarf við fulltrúa annarra ríkja, alþjóðastofnana og hagsmunaaðila.

Krefjast yfirgripsmikillar og árangursríkrar reynslu af utanríkismálum

Þess er krafist að umsækjendur hafi lokið háskólaprófi sem nýtist í störfum fyrir utanríkisþjónustuna og hafi „yfirgripsmikla og árangursríka reynslu af meðferð utanríkismála í ráðuneyti, sendiskrifstofum, alþjóðastofnunum eða með öðrum hætti sem fyllilega má jafna til þess“.

Einnig að viðkomandi búi yfir staðgóðri þekkingu á helstu málefnasviðum utanríkisþjónustunnar, yfir reynslu og þekkingu af mannauðsmálum og ríkri þjónustulund og aðlögunarhæfni.

Viðkomandi þurfa einnig að hafa framúrskarandi og víðtæka reynslu af því að byggja upp og viðhalda alþjóðlegu tengslaneti og hafa sýnt fram á leiðtogahæfileika, framsýni og árangursríka stjórnunarreynslu.

Hæfisnefnd skipuð þremur einstaklingum mun verða utanríkisráðherra til ráðgjafar um hæfi og almennt hæfi. Umsóknarfrestur er til og með 10. desember næstkomandi.

Vekur enn frekari spurningar um hæfi Svanhildar

Auglýsingin vekur einna helst athygli í ljósi skipunar Svanhildar Hólm Valsdóttur, fyrrverandi fjölmiðlakonu og aðstoðarmanns Bjarna Benediktssonar, sem sendiherra í Washington.

Embættið þykir eitt það mikilvægasta í utanríkisþjónustunni og margir hafa sett spurningamerki við hæfni Svanhildar til að gegna því. 

Heimildin greindi meðal annars frá því 18. nóvember síðastliðinn að þegar ferill Svanhildar væri borinn saman við bakgrunn sendiherra nágrannþjóða Íslands sem störfuðu í Bandaríkjunum væri hún með áberandi minnsta reynslu.

Heimildin hafði líka eftir Gunnari Helga Kristinssyni, prófessor í stjórnmálafræði við Háskóla Íslands, að tilnefningin hefði sent mjög neikvæð skilaboð til þeirra sem störfuðu við utanríkisþjónustu. „Þeir hagsmunir sem hér er verið að gæta eru þannig ekki hagsmunir utanríkisþjónustunnar eða íslenska ríkisins,“ sagði hann.

Stjórnskipunar- og eftirlitsnefnd fjallaði um málið og sagði Þórhildur Sunna Ævarsdóttir, þingflokksformaður Pírata, augljóst að hroðvirknislega hefði verið staðið að skipuninni.