Bein út­sending: Mót­vindur – fundur um ferða­þjónustu í Suður­kjör­dæmi

Fundurinn fer fram á Hótel Selfossi á Selfossi og stendur á milli klukkan 17 og 19 í dag. Hægt verður að fylgjast með fundinum í beinu streymi í spilaranum að neðan.

Í tilkynningu frá Samtökum ferðaþjónustunnar segir að fundurinn fari fram á mikilvægum tímapunkti.

„Á Alþingi liggja nú fyrir stór mál sem snerta ferðaþjónustuna með beinum hætti og geta haft veruleg áhrif á rekstrarskilyrði greinarinnar og atvinnulíf í Suðurkjördæmi. Þar má meðal annars nefna skattahækkanir á baðlón, krónutöluhækkanir á gistináttaskatti og innviðagjaldi ásamt frumvarpi til laga um náttúru- og innviðagjald, svokallaðan náttúrupassa.

Þetta eru ekki aðeins málefni ferðaþjónustunnar. Þau snúa að atvinnu, fjárfestingu, samkeppnishæfni og byggðaþróun í Suðurkjördæmi og því er mikilvægt að þau séu rædd af fulltrúum kjördæmisins við þá sem starfa í greininni og þekkja stöðuna af eigin raun.

Á fundinum mun Deloitte kynna niðurstöður á greiningu sem fyrirtækið hefur unnið fyrir SAF um áætlaðar skatta- og gjaldahækkanir á ferðaþjónustu sem liggja fyrir í fjárlagafrumvarpi ríkisstjórnarinnar. Þá verða flutt erindi frá SAF og fulltrúum sveitarstjórnarmála og ferðaþjónustu í kjördæminu.

Erindi flytja:

• Jóhannes Þór Skúlason, framkvæmdastjóri Samtaka ferðaþjónustunnar
• Frímann Snær Guðmundsson, meðeigandi Deloitte
• Kristján Pétur Kristjánsson, eigandi Konvin Hotel
• Haraldur Þór Jónsson, oddviti Skeiða- og Gnúpverjahrepps

Fundarstjórar: Þuríður H. Aradóttir Braun, forstöðumaður Markaðsstofu Reykjaness og Ragnhildur Sveinbjarnardóttir, framkvæmdastjóri Markaðsstofu Suðurlands

Seinni hluti fundarins verður vettvangur beinna samtala við þingmenn Suðurkjördæmis um þau mál sem nú eru efst á baugi hjá ferðaþjónustunni.

Þátttakendur í pallborðsumræðum:

• Guðrún Hafsteinsdóttir, þingmaður Sjálfstæðisflokks
• Halla Hrund Logadóttir, þingmaður Framsóknarflokksins
• Karl Gauti Hjaltason, þingmaður Miðflokksins
• Sandra Sigurðardóttir, þingmaður Viðreisnar
• Sigurður Helgi Pálmason, þingmaður Flokks fólksins
• Víðir Reynisson, þingmaður Samfylkingar

Umræðustjóri: Jóhannes Þór Skúlason, framkvæmdastjóri SAF