Willum í stjórn Litla spítalans

Willum, sem er í dag forseti Íþrótta- og ólympíusambands Íslands (ÍSÍ), var heilbrigðisráðherra á árunum 2021–2024 og Guðrún Ása Björnsdóttir, stofnandi Litla spítalans ehf., var aðstoðarmaður hans frá 2022.

Hvorugt þeirra vildi staðfesta þessar fregnir þegar Vísir hafði samband né tjá sig um málið.

Að svo stöddu hefur Guðrún Ása ein setið í stjórn félagsins frá því að það var stofnað í janúar þessa árs. Samþykkt félagsins frá því í lok júní kveður aftur á móti á um að þrír til fimm stjórnarmenn verði að vera kjörnir á aðalfundi félagsins (nema ef hluthafar eru fjórir eða færri).

Enn á því eftir að skipa stjórn félagsins og enn liggur ekki fyrir hverjir aðrir muni sitja í stjórninni. 

Samkvæmt heimildum Vísis er Willum þó ekki á förum frá ÍSÍ.

Óvissa um fjármagn

Enn er uppi óvissa um fjármögnun verkefnisins þar sem Alma D. Möller heilbrigðisráðherra hefur sagt að ekkert fjárhagslegt svigrúm sé hjá Sjúkratryggingum Íslands til að kaupa smáslysaþjónustu af Litla spítalanum.

Félagið bíður enn svara við erindi sínu frá Sjúkratryggingum Íslands og ekki liggur enn fyrir hvort, og þá með hvaða hætti, SÍ myndi taka þátt í kostnaði við þjónustuna. 

Sigurður Helgi Helgason, forstjóri Sjúkratrygginga Íslands, var skipaður af Willum árið 2023. Ráðningin var umdeild á sínum tíma þar sem ekki var auglýst í starfið.

Stórt og mikið verkefni

Litli spítalinn á að vera einkarekin heilbrigðisþjónusta sem hefur verið í undirbúningi í Austurveri að Háaleitisbraut 68 í Reykjavík síðustu mánuði. Heilbrigðisstofnuninni er ætlað að brúa bil milli heilsugæslu og sjúkrahúsþjónustu.

Umfangsmiklar framkvæmdir standa um þessar mundir yfir á svæðinu.

Auk Guðrúnar, sem er sérhæfð í lyflækningum, kemur fjöldi reynslubolta úr heilbrigðiskerfinu að verkefninu. Þar á meðal Hilmar Kjartansson, fyrrverandi yfirlæknir bráðadeildar Landspítalans, – en hann mun stýra heilbrigðisstofnuninni – og Eggert Eyjólfsson, yfirmaður bráðalækninga á Heilbrigðisstofnun Suðurnesja (HSS), sem mun sinna lækningum.