Allt virðist mega ef BDSM-orðið er notað

Í dóminum er vísað til samskipta fólksins á Instagram þar sem maðurinn hafði greint konunni frá því að hann hefði áhuga á að beita hörku í kynlífi. Landsréttur taldi að af samskiptunum mætti ráða að konan hafi gert sér grein fyrir áhuganum og fyrir dómi sagði hann að þau hefðu rætt um mörk og sammælst um öryggisorð. Konan lýsti samskiptunum hins vegar á allt annan hátt og sagði að þau hefðu lítið rætt saman í eigin persónu.

Í ákæru er því meðal annars lýst að maðurinn hafi slegið konuna í andlitið, þrýst hné sínu á efri hluta bringu hennar, tekið hana hálstaki og haldið kodda yfir andliti hennar. Konan hlaut meðal annars rifbeinsbrot, yfirborðsáverka á höfði, tognun í hálsi, öxl, mjóbaki og mjaðmagrind og heyrnartap.

Við meðferð málsins í héraði kom fram að karlmaðurinn ætti að baki dóm frá 2020 fyrir nauðgun, kynferðislega áreitni og ofbeldi í nánu sambandi.

Maðurinn var sakfelldur fyrir nauðgun í héraðsdómi og dæmdur í fimm ára fangelsi. Landsréttur sneri niðurstöðunni við. Maðurinn var sýknaður og meirihluti dómara taldi gögn ekki sýna fram á að hann hefði af ásetningi valdið konunni meiðslum umfram það sem hann hafi mátt ætla að hún samþykkti.

Drífa Snædal talskona Stígamóta segir dóminn einn þann mest sláandi sem hún hefur séð.

„Þarna er um beinbrot að ræða og þá veltir maður fyrir sér hvernig þetta væri í einhverju öðru samhengi. Ef fólk væri búið að ákveða að útkljá eitthvað með handalögmálum og þetta væru beinbrot, er þá ekki hægt að kæra það? Á þetta bara við þegar karlar nauðga konum? Er einhver undirliggjandi kvenfyrirlitning þarna varðandi það að konur geti afsalað sér lífi og heilsu í hendur karlmanna og að það sé bara samþykkt?“ spyr Drífa.

Endurmenntun um reynsluheim kvenna

Drífa segir lögin skýr um að samþykki þurfi fyrir kynlífsathöfnum. Dómaframkvæmdin sé önnur.

„Og síðan eru skilaboðin til karla, ef það er búið að segja BDSM-orðið, að þá greinilega má bara allt og það eru engin mörk,“ segir hún. „Þetta eru rosaleg skilaboð út í samfélagið.“

Þrír skipuðu dóminn, tveir karlar sem sýknuðu manninn og kona sem skilaði sératkvæði og vildi staðfesta sakfellingu héraðsdóms. Drífa segir það athyglisvert.

„Ég held að það þurfi einhvers konar endurmenntun í Landsrétti um reynsluheim kvenna og hættu á að verða fyrir ofbeldi. Við erum að sjá ítrekað að Landsréttur er að snúa við dómum sem eru vel undirbyggðir í héraði og það þarf bara að fara að taka rannsókn á því hvernig þankagangur Landsréttar er þessa dagana.“