Hestamenn fá margvíslegan stuðning

Landssamband hestamannafélaga, Landsmót hestamanna ehf. og Samskip hf. hafa undirritað víðtækan samstarfs- og styrktarsamning sem tekur til nokkurra af helstu viðburðum hestamennsku og hestaíþrótta til loka árs 2013, þar á meðal landsmóta, Íslandsmóta og bæði heimsmeistaramóts og Norðurlandamóts íslenskra hesta. Stuðningur Samskipa er með margvíslegum hætti, svo sem flutningar og flutningatengd þjónusta, verðlaunagripir, tæki og búnaður. Haraldur Þórarinsson, stjórnarformaður Landssambands hestamannafélaga og Landsmóts hestamanna ehf., og Ásbjörn Gíslason, forstjóri Samskipa, undirrituðu samstarfssamninginn. Haraldur segir að stuðningur Samskipa sé afar mikilvægur og hafi þau áhrif að auðveldara verði að halda niðri kostnaði við mótshald og útgerð landsliða, sem ella myndi lenda á hestamönnum og mótsgestum að greiða í formi hærri aðgangseyris og þátttökugjalda. Ásbjörn segir að Samskip horfi meðal annars til þess að íslenski hesturinn beri hróður lands og þjóðar víða um veröld og höfði til fjölda fólks á öllum aldri. Það sjáist best á því að um 11.500 manns manns stundi hestamennsku á Íslandi og um 60.000 manns innan alþjóðasamtaka íslenska hestsins í 19 þjóðlöndum og þremur heimsálfum. Hestamót hérlendis og erlendis séu fjöldasamkomur sem dragi sífellt að sér meiri athygli fólks, langt út fyrir raðir sjálfra iðkendanna. Samskip vilji leggja samtökum hestmanna lið og styrkja enn frekar öfluga starfsemi þeirra í þágu iðkenda hestaíþrótta og allra aðdáenda íslenska hestsins nær og fjær. Hestaíþróttaviðburðir sem samningurinn tekur til: Landsmót hestamanna á Vindheimamelum í Skagafirði 2011 og í Reykjavík 2012, Íslandsmót fullorðinna á Selfossi 2011, Íslandsmót barna- og unglinga í Keflavík 2011, Íslandsmót fullorðinna á Vindheimamelum 2012, Íslandsmót barna- og unglinga á Hellu 2012, Hestadagar í Reykjavík 2012, ístölt landsliðsins í Skautahöllinni í Reykjavík heimsmeistaramótið í Austurríki 2012 og Norðurlandamótið 2013.

Rafmagnslaust í 5 mínútur

Rafmagnslaust varð í hluta Grafarvogs, Mosfellsbæjar og á Kjalarnesi laust eftir klukkan 14:30 í dag vegna bilunar í spenni í aðveitustöð við Korpu. Rafmagn var komið aftur á 5 mínútum síðar. Samkvæmt upplýsingum frá Orkuveitu Reykjavíkur er verið að kanna orsakir bilunarinnar.

Bótakröfu hafnað - hugar að málsókn

Anna Kristín Ólafsdóttir hugar nú að málsókn í kjölfar höfnunar ríkislögmanns á 5 milljóna króna bótakröfu sem Anna Kristín lagði fram á þeim grundvelli að jafnréttislög hefðu verið brotin þegar karlmaður var ráðinn framyfir hana við ráðningu skrifstofustjóra í Forsætisráðuneytinu.

SA staðfesta kjarasamninga

Samtök atvinnulífsins hafa ákveðið að staðfesta gildistöku kjarasamninga frá 22. júní 2011 í samræmi við ákvæði kjarasamninganna sem undirritaðir voru 5. maí síðastliðinn. Þetta kemur fram í yfirlýsingu frá SA. Þar segja samtökin að þau fallist á samingana, þrátt fyrir það sem SA telja vanefndir ríkisstjórnarinnar.

Aukið umferðareftirlit við borgarmörkin

Lögreglan á höfuðborgarsvæðinu mun í sumar halda uppi auknu umferðareftirliti á Vesturlandsvegi, Suðurlandsvegi og Reykjanesbraut í tengslum við umferðaröryggisáætlun. Meginmarkmiðið með eftirlitinu er að draga úr ökuhraða en jafnframt að tryggja eins og hægt er að vanbúin ökutæki séu ekki á ferð um þjóðvegi landsins. Eftirlitið stendur yfir alla daga en þungi þess verður þó yfir helgarnar þegar umferðin og þörfin er mest. Sérstaklega verður hugað að ljósabúnaði, skráningu og hleðslu ökutækja, tjaldvagna, fellihýsa og hjólhýsa. Einnig verður fylgst með því að hliðarspeglar ökutækja sem draga breiða eftirvagna séu samkvæmt reglum. Lögreglan hvetur ökumenn sem fyrr til aðgæslu og tillitssemi í umferðinni svo ekki þurfi að grípa til sekta og jafnvel kyrrsetningar tækja. Sent fyrir hönd Lögreglunnar á höfuðborgarsvæðinu.

Níu mánaða fangelsi fyrir kynferðisbrot

Karlmaður frá Suðurnesjum var dæmdur í níu mánaða óskilorðsbundið fangelsi í Héraðsdómi Reykjaness í dag fyrir kynferðisbrot gegn sextán ára dreng. Þá er hann dæmdur fyrir að gefa honum og öðrum sextán ára dreng, áfengi, en slíkt er ólöglegt samkvæmt áfengis- og barnaverndarlögum.

Lamdi rangan mann fyrir að kalla félaga sína "þræla og górillur“

Karlmaður var sektaður í dag um 75 þúsund krónur fyrir að hafa slegið og sparkað í höfuð manns við skyndibitastaðinn Hlöllabáta í miðborg Reykjavíkur í júní árið 2009. Ástæðan var sú að hann taldi að fórnarlambið hefði kallað þeldökka félaga sína "svertingja, górillu og þræl“ eins og fram kemur í dómi Héraðsdóms Reykjavíkur.

Leitað eftir hugmyndum um þróun Þingvalla

Þingvallanefnd leitar eftir hugmyndum almennings um hvernig taka megi á móti þeim þúsundum Íslendinga og erlendra gesta sem á ári hverju vilja upplifa sérstöðu Þingvalla án þess að ganga á tækifæri komandi kynslóða til að njóta staðarins.

Grímuklæddir menn rændu tveimur stúlkubörnum í Noregi

Tveimur ungum stúlkum var í dag rænt af frístundaheimili í Hadeland í Noregi. Tveir grímuklæddir menn ruddust inn vopnaðir táragasi og rafmagnsbyssum og hrifsuðu börnin frá írakskri móður þeirra. Gríðarleg leit hefur verið gerð að börnunum í Noregi í dag og fyrir stundu voru tveir menn handteknir í bíl sem lýst hafði verið eftir. Stúlkurnar voru þó ekki í bílnum og er þeirra enn leitað. Þær eru eins árs og þriggja ára gamlar.

26,7% bera lítið traust til Landlæknisembættis

26,7% landsmanna segjast bera lítið traust til Landslæknisembættisins samkvæmt nýrri könnun sem framkvæmd var af MMR dagana 9.-15. júní.

Dimmuborgir og Hverfjall friðuð

Dimmuborgir og Hverfjall í Skútustaðahreppi verða friðlýst á morgun við hátíðlega athöfn. Svandís Svavarsdóttir, umhverfisráðherra, undirritar friðlýsinguna og mun athöfnin fara fram við rætur Hverfjalls og inni í Dimmuborgum

Bubbi Morthens endurheimti þýfi fyrir Hugleik

"Bubbi skipaði glæpónunum að senda þetta upp í Efstaleiti,“ segir rithöfundurinn Hugleikur Dagsson, sem endurheimti efnið sem var á tölvunni hans sem var stolið fyrir skömmu.

Tveir sextán ára piltar lentu í vinnuslysi

Tveir sextán ára gamlir drengir slösuðust í Vinnslustöðinni í Vestmannaeyjum í síðustu viku. Annar drengjanna flækti hanska í færibandi með þeim afleiðingum að hann handleggsbrotnaði.

Sprauta vatni á smábátana svo ferjan komist áfram

Sannkallað ferjuæði hefur skapast í Noregi vegna sjónvarpsútsendingar frá Hurtigruten, siglingu ferjunnar Nordnorge. Útsendingin slær áhorfsmet og hvarvetna sem ferjan kemur mætir henni mannhaf á bryggjunum til að fagna henni.

Björgunarvestaþjófa leitað

Brotist var inn í bílskúr við Kirkjubæjarbraut í Vestmannaeyjum í síðustu viku. Þjófurinn stal fjórum björgunarvestum.

Fimmtán ára handtekinn með fíkniefni í Vestmannaeyjum

Tvö fíkniefnamál komu til kasta lögreglunnar í Vestmannaeyjum í byrjun vikunnar. Lögreglan hafði afskipti af tveimur einstaklingum vegna gruns um að þeir væru með fíkniefni á sér.

Dagur hjólabrettisins haldinn hátíðlegur

Dagurinn í dag er alþjóðlegur dagur hjólabrettisins og af því tilefni ætla áhugamenn um íþróttina, eða lífstílinn, að hittast við Hallgrímskirkju klukkan tólf í hádeginu og renna sér niður á Ingólfstorg. Brettafélag Reykjavíkur stendur fyrir viðburðinum hér á landi en um allan heim koma menn saman á þessum degi og renna sér.

Mál Müller til ákæruvaldsins

Lögreglan á höfuðborgarsvæðinu er búin að rannsaka kynferðisbrot, sem beinist að Margréti Múller heitinni, þegar hún var kennari við Landakotsskóla. Málið hefur verið sent ákærusviði að sögn Björgvin Björgvinssonar, yfirmanns kynferðisbrotadeildar lögreglunnar.

Nýr sýningasalur opnar á Hornafirði

Nýr sýningasalur Listasafns Hornafjarðar verður opnaður við hátíðlega athöfn þann 24. júní næstkomandi. Salurinn er til húsa í Gömlu Slökkvistöðina og verður opnunarsýningin á verkum Svavars Guðnasonar.

Lögregla sökuð um að skilja mann tvívegis eftir í óbyggðum

Aðalmeðferð fer fram í dag í máli ríkissaksóknara gegn lögregluvarðstjóra á Selfossi sem hefur verið ákærður fyrir að fara offari í framkvæmd lögreglustarfans og ekki gætt lögmætra aðferða sem stjórnandi lögregluaðgerðar.

Reyna að ná í glæpón með því að lýsa eftir kærustunni

Bandaríska alríkislögreglan hefur ákveðið að beita óhefðbundum aðferðum til þess að freista þess að hafa hendur í hári James "Whitey" Bulger, sem er efstur á lista stofnunarinnar yfir eftirlýsta glæpamenn.

Mannskæð árás í Írak

Að minnsta kosti tuttugu og tveir eru látnir eftir sprengjuárás í miðhluta Íraks í nótt. Árásin var gerð fyrir utan hús ríkisstjórans í Diwaniya en héraðið er rúmlega 100 kílómetra suður af Bagdad. Talið er líklegt að um sjálfsmorðsárás hafi verið að ræða og að tilræðismennirnir hafi verið tveir. Mjög hefur dregið úr ofbeldi í landinu síðustu misserin en þrátt fyrir það eru árásir af þessari tegund enn tíðar.

Áhöfn skorar á þingmenn

Áhöfnin á fjölveiðiskipinu Barða frá Neskaupstað segir í áskorun til þingmanna, að allt tal um eflingu sjávarbyggða, í nýsamþykktu frumvarpi um stjórn fiskveiða, sé blekking, því til að auka veiðiheimildir á einum stað þurfi að minnka þær á öðrum.

Fyrrverandi forseti dæmdur í 35 ára fangelsi

Dómstóll í Túnis hefur dæmt forsetann fyrrverandi, Zine Ben Ali og eiginkonu hans Leilu í 35 ára fangelsi fyrir fjárdrátt og misnotkun á almannafé. Hjónin sem flúðu land til Sádí Arabíu í Janúar eftir að almenningur hafði mótmælt ástandinu í landinu, voru einnig sektuð um 66 milljónir dollara.

Öskuský enn til vandræða í Ástralíu

Öskuskýið frá eldfjallinu í Chile sem gosið hefur síðustu daga hefur á ný sett flug úr skorðum í Ástralíu. Í síðustu viku þurfti að aflýsa þúsundum ferða og nú er skýið komið aftur inn í ástralska lofthelgi eftir að hafa borist hringinn í kringum jörðina með háloftavindum að því er fram kemur hjá BBC.

Fjörutíu og fjórir fórust í flugslysi - átta komust af

Fjörutíu og fjórir fórust þegar farþegaflugvél hrapaði í Norð-Vestur Rússlandi í nótt. Átta liggja slasaðir á sjúkrahúsi. Vélin, sem er af gerðinni Tupolev 134 frá flugfélaginu RusAir, átti um einn kílómeter ófarinn að flugvellinum þegar eitthvað fór úrskeiðis.

Ekið á kind og lamb við Patreksfjörð

Ekið var á kind og lamb á þjóðveginum skammt frá Patreksfirði í gærkvöldi og drápust þau bæði. Það sem af er mánuðinum hefur lögreglunni á Vestfjörðum borist ellefu tilkynningar um slíkt, héðan og þaðan af öllu svæðinu, enda eru óvíða fjárheldar girðingar við þjóðvegina á Vestfjörðum.

Borgarlistamaður útnefndur á morgun

Borgarlistamaður Reykjavíkur 2011 verður útnefndur af borgarstjóranum í Reykjavík síðdegis á morgun. Athöfnin fer fram í Höfða klukkan fjögur. Einar Örn Benediktsson, formaður menningar- og ferðamálaráðs Reykjavíkur, gerir grein fyrir vali ráðsins á listamanninum og tónlistaratriði flytja félagar úr Caput, Tónlistarhópi Reykjavíkurborgar 2011. Útnefning borgarlistamanns er heiðursviðurkenning til handa reykvískum listamanni sem með listsköpun sinni hefur skarað fram úr og markað sérstök spor í íslensku listalífi. Þeir einir listamenn koma til greina við útnefningu borgarlistamanns, sem búsettir eru í Reykjavík. Viðurkenningin borgarlistamaður hefur tíðkast síðan árið 1995 og kom þá í stað eins árs starfslauna. Hana hafa hlotið: 1995 Guðmunda Andrésdóttir, 1996 Jón Ásgeirsson, 1997 Hörður Ágústsson, 1998 Thor Vilhjálmsson, 1999 Jórunn Viðar, 2000 Björk, 2001 Kristján Davíðsson, 2002 Hörður Áskelsson, 2003 Ingibjörg Haraldsdóttir, 2004 Hallgrímur Helgason, 2005 Rúrí og Páll Steingrímsson, 2006 Edda Heiðrún Backman, 2007 Ragnar Bjarnason, 2008 Þórarinn Eldjárn, 2009 Steinunn Sigurðardóttir 2010 Kristbjörg Kjeld.

Þriggja ára stúlka slapp ómeidd úr bílveltu

Þriggja ára stúlka slapp alveg ómeidd og afi hennar, á miðjum aldri, meiddist lítið þegar bíll þeirra fór út af Ólafsfjarðarvegi í gærkvöldi, valt og hafnaði ofan í skurði, langt frá veginum. Að söng lögreglunnar í Ólafsfirði er með ólíkindum hvað þau sluppu vel miðað við aðstæður og skemmdir á bílnum, en litla stúlkan var í góðum barnastól og afinn var með öryggisbelti. Ekki er ljóst hvað fór úrskeiðis við aksturinn.

Næturfrost á hálendinu

Næturfrost var víða á hálendinu í nótt og niður í byggðir á norðaustanverðu landinu. Kuldinn á hálendinu tefur fyrir að snjófannir bráðni þar af vegum, þannig að hálendisvegirnir eru lang flestir enn lokaðir.

Vopnað rán í Reykjavík - ræningjans leitað

Vopnað rán var framið í sólarhringsverslun í vesturhluta Reykjavíkur um klukkan hálf fjögur í nótt. Þjófurinn, sem var grímuklæddur, ógnaði starfsfólki með hnífi og hafði á brott með sér eitthvað af peningum úr peningakassanum.

Segir enga þöggun um landnámskenningar

Gunnar Karlsson sagnfræðingur hafnar ásökunum um að fræðasamfélagið á Íslandi einblíni á fornrit varðandi tímasetningu landnáms og þaggi niður kenningar sem gangi gegn þeim.

Vilja kjörna fulltrúa burt úr stjórn OR

Skil verða á milli stjórnar og eigenda Orkuveitu Reykjavíkur (OR) verði hugmyndir meirihlutans í Reykjavík að veruleika. Vilji hans stendur til þess að kjörnir fulltrúir sitji ekki í stjórn OR heldur verði ráðið í hana eftir hæfni.

Iceland Express seint í 64 prósentum tilvika

Iceland Express stendur sig illa í að halda áætlun miðað við helstu flugfélög í flugi um Keflavíkurflugvöll. Þetta kemur fram í tölum Isavia ohf. sem rekur íslenska flugvelli.

Fyrirtækjarisi fjárfestir í íslensku vatni

"Nú er fyrirtækið að fullu fjármagnað, við getum gefið í og farið í markaðssetningu af krafti. Við höfum vaxið töluvert en nú getum við fylgt því eftir á myndarlegan hátt," segir Jón Ólafsson, stofnandi og stjórnarformaður Icelandic Water Holdings.

Í dag ræðst hvort kjarasamningar halda

Samtök atvinnulífsins taka ákvörðun um það í dag hvort kjarasamningarnir sem skrifað var undir í maí verða látnir gilda til þriggja ára eða einungis fram yfir næstu áramót.

Skipverji með 4 kíló af amfetamíni

Skipverji á Goðafossi situr nú í gæsluvarðhaldi grunaður um smygl á fjórum kílóum af amfetamíni til landsins.

Ágreiningur um byggðaáherslurnar

Ólína Þorvarðardóttir, varaformaður sjávarútvegs- og landbúnaðarnefndar Alþingis, segir ekki hægt að skoða kvótamál eingöngu út frá nýútkominni hagfræðingaskýrslu. Til að setja málið í samhengi þurfi aðra úttekt; á afleiðingum núverandi kvótakerfis á byggðir og samfélag síðustu 20 árin.

178 útskrifaðir frá Keili

Keilir, miðstöð vísinda, fræða og atvinnulífs sem hefur aðsetur á Keflavíkurflugvelli, útskrifaði samtals 178 nemendur í vor, en útskriftir fóru fram bæði í Reykjavík og á Akureyri. Þetta kemur fram í fréttatilkynningu frá Keili.

FÍB ítrekar andstöðu við vegatolla

Félag íslenskra bifreiðaeigenda gaf í dag út fréttatilkynningu þar sem þeir ítreka andstöðu sína við þær hugmyndir um einkavæðingu vegakerfisins og vegatolla á vegfarendur sem Alþýðusambandsins og Samtaka atvinnulífsins berjast nú fyrir.

Jackass-stjarna lætur lífið í bílslysi

Jackass-stjarnan Ryan Dunn lést í bílslysi í gærkvöldi en þetta kemur fram á vefnum TMZ.com.

Tekinn með fjögur kíló af amfetamíni

Karlmaður á fertugsaldri hefur verið úrskurðaður í gæsluvarðhald til fimmta júlí næstkomandi að kröfu lögreglustjórans á höfuðborgarsvæðinu. Þetta kemur fram í tilkynningu frá lögreglu.

Opnað fyrir ótakmarkaða sköpun á lénum

Fyrirtækið ICANN (Internet Corporation for Assigned Names and Numbers), sem hefur um árabil séð um ýmis verkefni tengd internetinu, svo sem úthlutun IP-talna, hefur nú ákveðið að leyfa sköpun nýrra léna.

Vilja að embætti umboðsmanns Alþingis verði stjórnarskrárbundið

B-nefnd Stjórnlagaráðs kynnti nýjan kafla um sveitarfélög í stjórnarskrá á 13. ráðsfundi. Þar er lagt til að stjórnarskrárbinda svokallaða nálægðarreglu, en hún kveður á um að þeir þættir opinberrar þjónustu sem betur þykir fyrir komið í héraði skuli vera á hendi sveitarfélaga.

Stal hundruðum lítra af díselolíu

Aðfaranótt fimmtudagsins 16. júní síðastliðinn voru unnin skemmdarverk á stórri hjólaskóflu í sandnámu í landi Hrauns í Ölfusi. Allar rúður hjólaskóflunnar voru brotnar og reynt hafði verið að gangsetja hana. Jafnframt var útvarpstæki úr vinnuvélinni stolið. Ljóst er að tjónið er mikið í krónum talið.