Innlent

Samráðshópur fer yfir áform um athvarf í Njálsgötu

Fjögurra manna samráðshópur verður væntanlega skipaður til að fara nánar yfir áform borgarinnar um að opna athvarf fyrir heimilislausa í húsnæði gistiheimilis að Njálsgötu 74. Vilhjálmur Þ. Vilhjálmsson borgarstjóri gerði þetta að tilögu sinni á fundi með íbúum í grennd við fyrirhugað athvarf, sem haldinn var í gærkvöldi.

Sluppu ómeiddir eftir árekstur við Hvítá

Ökumenn, sem voru einir í bílum sínum, sluppu ómeiddir þegar bílar þeirra skullu saman úr gagnstæðum áttum á Iðubrú yfir Hvítá í Biskupstungum í gærkvöldi. Brúin er einbreið hengibrú og þegar ökumaður annars bílsins sá að hinn bíllinn var kominn langt inn á brúnna, ætlaði hann að bremsa, en bremsurnar biluðu með þessum afleiðingum. Báðir ökumenn voru í bílbeltum.

Viðskiptaráðuneytið spennandi

Björgvin G. Sigurðsson nýr viðskiptaráðherra Samfylkingarinnar segir viðskiptaráðuneytið spennandi ráðuneyti og mörg stór verkefni framundan á þeim vettvangi. Hann lýsti ánægju sinni með stjórnarsáttmálann, sáttmálinn væri metnaðarfullur og hefði fengið glymjandi fínar móttökur hjá flokksmönnum.

Endurvinnsluátak í pappír

Aðeins fjörutíu prósent af dagblöðum, tímaritum og bæklingum sem borin eru í hús fara í endurvinnslu og næstum þriðjungur af heimilissorpinu er pappír. Hópur fyrirtækja hefur ákveðið að hefja átak til að hvetja almenning til endurvinnslu á pappír.

Njálsgötubúar á íbúafundi í Austurbæjarskóla

Bakgarðurinn við fyrirhugað heimili fyrir húsnæðislausa á Njálsgötunni verður segull á ógæfumenn miðborgarinnar, segir íbúi við Njálsgötu. Íbúar fjölmenntu nú síðdegis á fund sem borgin hélt um málið. Borgarstjóri boðaði þar samráðshóp með fulltrúum íbúa.

Konum fækkar í stjórnum fyrirtækja

Engin kona situr í stjórn rúmlega sjötíu af hundrað stærstu fyrirtækjum landsins. Tvær konur gegna í þeim stjórnarformennsku.

Kaupa ekki fisk frá hvalatengdum fyrirtækjum

Sjö leiðandi matvöruverslanakeðjur í Bretlandi hafa heitið því að kaupa ekki fisk frá fyrirtækjum sem tengjast hvalveiðum. Hvalur er stór hluthafi í Granda, sem er stærsta útgerðarfélag hér á landi. Keðjurnar eru Waitrose, Tesco, Sainhsbury´s, Marks og Spencer, Co-up og Iceland, sem er að hluta til í eigu Baugs.

Peningamálastefna stjórnvalda gengur að sjávarútvegi dauðum

Einar Oddur Kristjánsson þingmaður Sjálfstæðisflokksins á Vestfjörðum, segir nauðsynlegt að horfið verði frá núverandi peningamálastefnu stjórnvalda og vextir lækkaðir. Núgildandi stefna sé að ganga frá sjávarútveginum dauðum og ný ríkisstjórn hljóti að breyta stefnunni.

Á annað þúsund ökutæki kolefnisjafna útblástur sinn

Á annað þúsund ökutæki á vegum fyrirtækja og einstaklinga hafa kolefnisjafnað útblástur sinn. Rúmlega sextíu þúsund tré verða gróðursett á Geitasandi sem er fyrsta skógtæktarland fyrir kolviðaskóga hér á landi. Ef kolefnisjafna ætti alla bíla á Íslandi þyrfti að gróðursetja um sjö milljónir trjáa á ári.

Hvalfjarðargöng lokuð næstu tvær nætur

Hvalfjarðargöng verða lokuð vegna viðhalds aðfaranótt miðvikudags 23. maí til og með aðfaranætur föstudagsins 25. maí frá miðnætti til kl. 6 að morgni. Þetta kemur fram í tilkynningu frá Vegagerðinni.

Hnefastór ísköggull

Bóndinn í Lækjartúni í Ásahreppi í Rangárvallasýslu fann hnefastóran ísköggul eftir að haglél gekk þar yfir í gærmorgun, að því er Morgunblaðið greinir frá. Fréttastofunni er kunnugt um álíka atburð í Noregi fyrir hátt í fimmtán árum sem setti vísindasamfélagið í Noregi á annan endan.

Hálka víða um land í nótt

Talsverð hálka myndaðist á Reykjanesbraut í nótt og var alveg fram undir morgun, en ekkert óhapp varð, sem rekja má til hennar eins og í fyrrinótt. Þá var hálka á Hellsheiði og í Þrengslum í morgun, en engin óhöpp urðu þar.

Vinnuálag getur leitt til sýklalyfjaónæmis barna

Vinnuálag foreldra kallar á skyndilausnir við eyrnarbólgum barna og afleiðingin getur orðið sýklalyfjaónæmi, segir heilsugæsluæknir í Hafnarfirði. Þrátt fyrir umræðu um ofnotkun sýklalyfja hefur salan á þeim aukist.

Hjólhýsasprengja

Sprenging hefur orðið í sölu hjólhýsa á undanförnum árum. Nýskráningar hjólhýsa hafa næstum þrítugfaldast á fimm árum.

Árni og Björn niður um eitt sæti

Björn Bjarnason og Árni Johnsen færast báðir niður um eitt sæti á listum Sjálfstæðismanna vegna útstrikana, samkvæmt niðurstöðu landskjörstjórnar. Björn færist niður í þriðja sæti í Reykjavík- suður, en Illugi Gunnarsson færist upp í annað sætið.

Fjórir bílar útaf á Reykjanesbraut

Fjórir bílar fóru út af Reykjanesbraut, á milli Hafnarfjarðar og Reykjanesbæjar síðla nætur, eftir að ökumenn þeirra misstu stjón á þeim í krapa og hálku. Nokkrir úr bílunum voru fluttir á Slysadeild, en engin reyndist alvarlega slasaður.

Reykspóluðu og kveiktu í bílnum

Eldur kviknaði í báðum afturdekkjum bíls, sem tveir sautján ára piltar höfðu verið að reykspóla á bílastæði við flugvöllinn í Vestmannaeyjum undir kvöld í gær. Lögreglumaður á frívakt sá mikinn reyk leggja frá bílnum og kallaði flugvallarslökkvibílinn á vettvang, sem kom í veg fyrir að bíllinn brynni til kaldra kola.

Einar leitar að söngstrákum

Einar Bárðarson umboðsmaður hyggst efna til áheyrnarprófs í Vestursal í FÍH þriðjudaginn 29.maí næstkomandi. Hann er á höttunum eftir karlkyns söngvurum á aldrinum 18 til 35 ára til að taka þátt í söngverkefni sem fer af stað í sumar.

Niðurfærsla Björns og Árna staðfest

Ný ríkisstjórn sögð vera að smella saman

Stjórnarmyndunarviðræðurnar á Þingvöllum standa enn yfir og er því haldið fram að ný ríkisstjórn sé að smella saman. Bæði Geir Haarde og Ingibjörg Sólrún Gísladóttir sögðu við fréttamenn síðdegis að viðræðurnar gengju vel, en vildu ekki tjá sig frekar.

Flestir hálendisvegir lokaðir

Ófært er yfir Hellisheiði eystri. Á Austurlandi er mikið um að Hreindýr séu við vegi og eru vegfarendur beðnir um að aka þar með gát. Annars eru helstu vegir landsins greiðfærir. Vegna aurbleytu og hættu á vegaskemmdum er allur akstur bannaður á flestöllum hálendisvegum sem að jafnaði eru ekki færir nema að sumarlagi.

Stuðningur vex við Álver á Húsavík

Nýleg skoðanakönnun, sem Capacent Gallup hefur gert á Norðausturlandi, leiðir í ljós að 69,5% íbúa eru hlynnt byggingu álvers á Bakka við Húsavík. Yfir 80% telja að bygging álvers myndi hafa jákvæð áhrif á búsetuskilyrði til lengri tíma á Norðurlandi. Niðurstaðan er byggð á svörum rúmlega 1500 manns á aldrinum 16-75 ára.

Mogginn óttast að Ingibjörg Sólrún sprengi ríkisstjórnina

Morgunblaðinu er í dag hugleikin sú hætta að Ingibjörg Sólrún Gísladótir geti búið til ágreining við Sjálfstæðisflokkinn á miðju kjörtímabilinu og myndað vinstri stjórn. Blaðið varar við því að þetta sé mesta hættan sem Geir H. Haarde standi frammi fyrir.

Jóhannes í Bónus á ekki von á sáttum

Jóhannes Jónsson, oftast kenndur við Bónus, segir ekki miklar líkur á að hann og Björn Bjarnason sættist á næstunni þrátt fyrir að hann sé að eðlisfari sáttfús maður. Hann segir Hannes Hólmstein Gissurarson ekki hafa umboð frá sér til sáttamiðlunar.