Bílar skullu saman í Garði

Minnstu munaði að slys hlytist af í gærkvöldi þegar ölvaður ökumaður ók þvers og kruss um veginn á leið heim til sín suður í Garði. Þegar bíll kom á móti honum tókst honum ekki að halda sig á sínum vegarhelmingi þannig að hliðar bílanna skullu saman og speglar og hliðarrúður brotnuðu. Sá ölvaði hélt samt áfram á fullri ferð en hinn ökumaðurinn sneri við og elti hann og gat vísað lögreglu á stútinn. Ökumaðurinn var þegar handtekinn og gistir hann fangageymslur.