Maraþonátök í Framsóknarflokknum 2. febrúar 2005 00:01 Altalað er meðal framsóknarmanna, svo notuð séu orð þeirra sjálfra, að Halldór Ásgrímsson ætli að draga sig í hlé í íslenskum stjórnmálum að loknu þessu kjörtímabili. Þau innbyrðis átök í flokknum sem flokkurinn hefur þurft að glíma við að undanförnu eru sögð snúast um það hver taki við formennsku flokksins af Halldóri. Slagurinn stendur milli tveggja fylkinga. Önnur er skipuð nánum samstarfsmönnum Halldórs og hafa bræðurnir Árni og Páll Magnússynir þar töglin og hagldirnar. Sú fylking hefur ýmist verið nefnd, "þæga liðið", "klíkan" eða jafnvel "nýi Framsóknarflokkurinn". Auk bræðranna hafa verið orðuð við þennan væng flokksins Valgerður Sverrisdóttir iðnaðar- og viðskiptaráðherra, Hjálmar Árnason þingflokksformaður, Guðjón Ólafur Jónsson varaþingmaður og Björn Ingi Hrafnsson, varaþingmaður og aðstoðarmaður Halldórs. Hinir óþægu Hin fylkingin samanstendur af rótgrónum framsóknarmönnum sem leggja öðru fremur áherslu á lýðræði, samvinnu og jafnræði, eða "gömlu góðu gildin" eins og þau eru nefnd. Þessi fylking hefur verið nefnd "hinir óþægu" og "Kidda-klíkan". Hana skipa meðal annarra Kristinn H. Gunnarsson þingmaður, Jónína Bjartmarz þingmaður, Siv Friðleifsdóttir þingmaður og Guðni Ágústsson landbúnaðarráðherra. Árni taki við af Halldóri Hræringarnar innan flokksins og átökin fyrir upphaf aðalfundar Félags ungra framsóknarmanna í Kópavogi í fyrrakvöld sem og í Freyjunni, Félagi framsóknarkvenna í Kópavogi eru sagðar snúast um það eitt að koma Árna Magnússyni í þá stöðu að hann verði öruggur arftaki Halldórs um formannssætið. Til þess að svo megi vera verður Árni að komast fram fyrir Siv í flokknum. Siv var fyrsti maður á lista Framsóknarflokksins í Suðvesturkjördæmi og var kjörin fimmti þingmaður kjördæmisins í síðustu alþingiskosningum. Hún var eini framsóknarmaðurinn í kjördæminu sem náði kjöri. Þá hefur Siv verið ritari flokksins og þar með gegnt einu helsta trúnaðarembætti flokksins. Ótryggt bakland í kjördæmi formannsins Árni var annar maður á lista Framsóknarflokks í Reykjavík norður. Framsóknarflokkurinn hefur þar mjög ótryggt bakland, fékk rúm 11 prósent í síðustu alþingiskosningum og alls ekki var útséð með að formaðurinn sjálfur, sem skipaði fyrsta sæti á listanum, næði kjöri. Árni komst sjálfur inn sem uppbótarþingmaður. Því stefna stuðningsmenn Árna að því að koma honum í öruggt sæti í kjördæmi sem hefur tryggt bakland framsóknarmanna. Tvö hafa verið nefnd, annað er Suðurkjördæmi, þar sem framsóknarmenn hafa löngum haft mikil ítök. Guðni Ágústsson var þar fyrsti maður á lista og hefur þar mikið persónufylgi. Á hæla hans var Hjálmar Árnason, sem ólíklegt er að muni vera gert að rýma sæti sitt fyrir Árna því hann hefur í erfiðum málum reynst formanninum haukur í horni sem formaður þingflokksins. Ítök í stjórnum hjálpa til Stuðningsmenn Árna horfa því hýrum augum til kjördæmis Sivjar, Suðvesturkjördæmis. Aðildarfélögin innan flokksins útnefna fulltrúa á flokksþing og kjördæmaþing. Á kjördæmaþingi er raðað á framboðslista. Ítök í stjórnum aðildarfélaganna hjálpa því til við að komast á framboðslista í kjördæminu en það er einmitt það sem átökin í Freyju nú á dögunum snerust um. Freyjan hefur verið orðuð við "hina óþægu" og er fyrrverandi formaður Freyjunnar, Una María Óskarsdóttir, sem var aðstoðarmaður Sivjar í umhverfisráðuneytinu, sögð vera í þeim hópi. Með því að taka yfir stjórn Freyjunnar með hjálp eiginkvenna sinna og vinkvenna þeirra, sem margar hverjar koma úr hvítasunnusöfnuðinum, náðu bræðurnir ítökum í aðildarfélagi sem áður var hliðhollt andstæðingum þeirra. Ber Siv þar hæst. Hrossakaup í Kópavogi "Óþæga liðið" í Kópavogi undirbjó mótleik fyrir aðalfund Félags ungra framsóknarmanna í Kópavogi á þriðjudagskvöld. Í stjórn sátu stuðningsmenn bræðranna og formaður var Einar Kristján Jónsson, bróðir Guðjóns Ólafs varaþingmanns. Andstæðingar þeirra hugðust taka yfir stjórnina og ná þannig til baka þeim fulltrúum flokksþings sem fylkingin hafði tapað við yfirtöku Freyjunnar. Smalað var um fjörutíu nýjum liðsmönnum svo þetta mætti takast, en áður en fundurinn hófst náðust sættir meðal fylkinganna. "Óþæga liðið", sem bæjarfulltrúinn Ómar Stefánsson var í fararbroddi fyrir, gerði samning við Pál Magnússon sem fundarmenn nefndu sumir "hrossakaup" á leið út af fundinum. Ómar fékk tvo fulltrúa í sjö manna stjórn, þar á meðal bróður sinn Jón Þorgrím Stefánsson, og ákveðinn fjölda fulltrúa á flokksþing. Spenna fyrir flokkþing Flokksþingið er það sem báðar fylkingarnar bíða spenntar eftir. Þar mun koma í ljós hverjir verða næstu leikir í valdataflinu sem mun þó ekki ná hámarki fyrr en á flokkþinginu að tveimur árum liðnum, árið 2007, þegar líklegt er að Halldór láti af formennsku. Halldórs-fylkingin er í nokkurri klemmu varðandi kjör til stjórnar. Til þess að styrkja stöðu Árna verður að reyna að koma annaðhvort Siv eða Guðna frá sem ritara og varaformanni. Líklegir fulltrúar á flokkþingi eru sagðir vera jafnmargir í hvorri fylkingunni og því þykir allt of áhættusamt að tefla Árna fram, hvort sem er gegn Siv eða Guðna, því ef hann tapar verða vonir hans um formannsembættið að tveimur árum að engu. Gætu teflt Valgerði fram Til þess að skáka "óþæga liðinu" og veikja stöðu Guðna og Sivjar verður "þæga liðið" að reyna að steypa öðru hvoru þeirra af stalli sem varaformanni og ritara. Þykir þar Valgerður Sverrisdóttir líklegust til árangurs enda er hún talin minna umdeild en Árni. Hún hefur jafnframt staðið lengi í fremstu línu í flokknum og var meðal annars fyrst kvenna til að gegna embætti iðnaðar- og viðskiptaráðherra. Valgerður gæti jafnframt starfað áfram sem varaformaður eða ritari við hlið Árna, takist honum að ná formannsstólnum á þarnæsta flokkþingi, eins og vonir hans standa til Framsóknarflokkurinn Fréttir Innlent Stj.mál Mest lesið „Mér að mæta“ ef krossar yrðu fjarlægðir Innlent Hlé vegna gagna frá ChatGPT Innlent Trump gerði lítið úr æðstu heiðursorðu bandarískra hermanna Erlent „Það er komið að skuldadögum“ Innlent Sérsveitin kölluð til í Urriðaholti Innlent Óttast að tapa bestu flúðum landsins í virkjun Innlent Katrín gerir upp framboðið og safnar heitum Innlent Pétur Jökull hljóti að vera einstaklega óheppinn Innlent Þriggja daga heitavatnsleysi í næstu viku Innlent Segir verkfræðinga á villigötum Innlent Fleiri fréttir Sagði Pétri Jökli að skipta um síma í snarheitum Starfsfólk í áfalli og kynhlutlaus salerni á barnum Skjálfti af stærðinni 3,0 í Mýrdalsjökli en enginn órói Alma Mjöll ráðin til þingflokks VG Flugfélagið Ernir svipt flugrekstrarleyfi „Það er komið að skuldadögum“ Kvikusöfnun og landris enn á sama hraða Pétur Jökull hljóti að vera einstaklega óheppinn „Algjörlega mistekist að stýra efnahag landsins“ Íbúafundur um uppbyggingu sem ógni flúðunum skilyrði Leita ökumanns sem ók á stúlku og stakk af Meiri tíðindi að stjórnin hafi lifað svo lengi Pottur á eldavél talinn upptök brunans á Amtmannsstíg Láglaunakonur heilsuveilli en konur með hærri laun Krefst að lágmarki sex og hálfs árs fangelsis yfir Pétri Jökli Ójöfnuður meðal kvenna og ríkisstjórnin gagnrýnd Gagnrýnir tvískinnung borgaryfirvalda með orlofsgreiðslur Dags Þriggja daga heitavatnsleysi í næstu viku Tæknileg vandræði hjá Háskóla Íslands Hlé vegna gagna frá ChatGPT Sérsveitin kölluð til í Urriðaholti „Mér að mæta“ ef krossar yrðu fjarlægðir Segir verkfræðinga á villigötum Landsvirkjun gerir 725 milljón króna tilboð í Toppstöðina Skjálfti í Bárðarbunguöskjunni Óttast að tapa bestu flúðum landsins í virkjun Rauðu örvarnar leika listir sínar á Íslandi Apabóla geti komið til landsins en muni ekki verða útbreidd Katrín gerir upp framboðið og safnar heitum „Viðbrögð lögreglu óásættanleg“ eftir líkamsárás á Þjóðhátíð Sjá meira
Altalað er meðal framsóknarmanna, svo notuð séu orð þeirra sjálfra, að Halldór Ásgrímsson ætli að draga sig í hlé í íslenskum stjórnmálum að loknu þessu kjörtímabili. Þau innbyrðis átök í flokknum sem flokkurinn hefur þurft að glíma við að undanförnu eru sögð snúast um það hver taki við formennsku flokksins af Halldóri. Slagurinn stendur milli tveggja fylkinga. Önnur er skipuð nánum samstarfsmönnum Halldórs og hafa bræðurnir Árni og Páll Magnússynir þar töglin og hagldirnar. Sú fylking hefur ýmist verið nefnd, "þæga liðið", "klíkan" eða jafnvel "nýi Framsóknarflokkurinn". Auk bræðranna hafa verið orðuð við þennan væng flokksins Valgerður Sverrisdóttir iðnaðar- og viðskiptaráðherra, Hjálmar Árnason þingflokksformaður, Guðjón Ólafur Jónsson varaþingmaður og Björn Ingi Hrafnsson, varaþingmaður og aðstoðarmaður Halldórs. Hinir óþægu Hin fylkingin samanstendur af rótgrónum framsóknarmönnum sem leggja öðru fremur áherslu á lýðræði, samvinnu og jafnræði, eða "gömlu góðu gildin" eins og þau eru nefnd. Þessi fylking hefur verið nefnd "hinir óþægu" og "Kidda-klíkan". Hana skipa meðal annarra Kristinn H. Gunnarsson þingmaður, Jónína Bjartmarz þingmaður, Siv Friðleifsdóttir þingmaður og Guðni Ágústsson landbúnaðarráðherra. Árni taki við af Halldóri Hræringarnar innan flokksins og átökin fyrir upphaf aðalfundar Félags ungra framsóknarmanna í Kópavogi í fyrrakvöld sem og í Freyjunni, Félagi framsóknarkvenna í Kópavogi eru sagðar snúast um það eitt að koma Árna Magnússyni í þá stöðu að hann verði öruggur arftaki Halldórs um formannssætið. Til þess að svo megi vera verður Árni að komast fram fyrir Siv í flokknum. Siv var fyrsti maður á lista Framsóknarflokksins í Suðvesturkjördæmi og var kjörin fimmti þingmaður kjördæmisins í síðustu alþingiskosningum. Hún var eini framsóknarmaðurinn í kjördæminu sem náði kjöri. Þá hefur Siv verið ritari flokksins og þar með gegnt einu helsta trúnaðarembætti flokksins. Ótryggt bakland í kjördæmi formannsins Árni var annar maður á lista Framsóknarflokks í Reykjavík norður. Framsóknarflokkurinn hefur þar mjög ótryggt bakland, fékk rúm 11 prósent í síðustu alþingiskosningum og alls ekki var útséð með að formaðurinn sjálfur, sem skipaði fyrsta sæti á listanum, næði kjöri. Árni komst sjálfur inn sem uppbótarþingmaður. Því stefna stuðningsmenn Árna að því að koma honum í öruggt sæti í kjördæmi sem hefur tryggt bakland framsóknarmanna. Tvö hafa verið nefnd, annað er Suðurkjördæmi, þar sem framsóknarmenn hafa löngum haft mikil ítök. Guðni Ágústsson var þar fyrsti maður á lista og hefur þar mikið persónufylgi. Á hæla hans var Hjálmar Árnason, sem ólíklegt er að muni vera gert að rýma sæti sitt fyrir Árna því hann hefur í erfiðum málum reynst formanninum haukur í horni sem formaður þingflokksins. Ítök í stjórnum hjálpa til Stuðningsmenn Árna horfa því hýrum augum til kjördæmis Sivjar, Suðvesturkjördæmis. Aðildarfélögin innan flokksins útnefna fulltrúa á flokksþing og kjördæmaþing. Á kjördæmaþingi er raðað á framboðslista. Ítök í stjórnum aðildarfélaganna hjálpa því til við að komast á framboðslista í kjördæminu en það er einmitt það sem átökin í Freyju nú á dögunum snerust um. Freyjan hefur verið orðuð við "hina óþægu" og er fyrrverandi formaður Freyjunnar, Una María Óskarsdóttir, sem var aðstoðarmaður Sivjar í umhverfisráðuneytinu, sögð vera í þeim hópi. Með því að taka yfir stjórn Freyjunnar með hjálp eiginkvenna sinna og vinkvenna þeirra, sem margar hverjar koma úr hvítasunnusöfnuðinum, náðu bræðurnir ítökum í aðildarfélagi sem áður var hliðhollt andstæðingum þeirra. Ber Siv þar hæst. Hrossakaup í Kópavogi "Óþæga liðið" í Kópavogi undirbjó mótleik fyrir aðalfund Félags ungra framsóknarmanna í Kópavogi á þriðjudagskvöld. Í stjórn sátu stuðningsmenn bræðranna og formaður var Einar Kristján Jónsson, bróðir Guðjóns Ólafs varaþingmanns. Andstæðingar þeirra hugðust taka yfir stjórnina og ná þannig til baka þeim fulltrúum flokksþings sem fylkingin hafði tapað við yfirtöku Freyjunnar. Smalað var um fjörutíu nýjum liðsmönnum svo þetta mætti takast, en áður en fundurinn hófst náðust sættir meðal fylkinganna. "Óþæga liðið", sem bæjarfulltrúinn Ómar Stefánsson var í fararbroddi fyrir, gerði samning við Pál Magnússon sem fundarmenn nefndu sumir "hrossakaup" á leið út af fundinum. Ómar fékk tvo fulltrúa í sjö manna stjórn, þar á meðal bróður sinn Jón Þorgrím Stefánsson, og ákveðinn fjölda fulltrúa á flokksþing. Spenna fyrir flokkþing Flokksþingið er það sem báðar fylkingarnar bíða spenntar eftir. Þar mun koma í ljós hverjir verða næstu leikir í valdataflinu sem mun þó ekki ná hámarki fyrr en á flokkþinginu að tveimur árum liðnum, árið 2007, þegar líklegt er að Halldór láti af formennsku. Halldórs-fylkingin er í nokkurri klemmu varðandi kjör til stjórnar. Til þess að styrkja stöðu Árna verður að reyna að koma annaðhvort Siv eða Guðna frá sem ritara og varaformanni. Líklegir fulltrúar á flokkþingi eru sagðir vera jafnmargir í hvorri fylkingunni og því þykir allt of áhættusamt að tefla Árna fram, hvort sem er gegn Siv eða Guðna, því ef hann tapar verða vonir hans um formannsembættið að tveimur árum að engu. Gætu teflt Valgerði fram Til þess að skáka "óþæga liðinu" og veikja stöðu Guðna og Sivjar verður "þæga liðið" að reyna að steypa öðru hvoru þeirra af stalli sem varaformanni og ritara. Þykir þar Valgerður Sverrisdóttir líklegust til árangurs enda er hún talin minna umdeild en Árni. Hún hefur jafnframt staðið lengi í fremstu línu í flokknum og var meðal annars fyrst kvenna til að gegna embætti iðnaðar- og viðskiptaráðherra. Valgerður gæti jafnframt starfað áfram sem varaformaður eða ritari við hlið Árna, takist honum að ná formannsstólnum á þarnæsta flokkþingi, eins og vonir hans standa til
Framsóknarflokkurinn Fréttir Innlent Stj.mál Mest lesið „Mér að mæta“ ef krossar yrðu fjarlægðir Innlent Hlé vegna gagna frá ChatGPT Innlent Trump gerði lítið úr æðstu heiðursorðu bandarískra hermanna Erlent „Það er komið að skuldadögum“ Innlent Sérsveitin kölluð til í Urriðaholti Innlent Óttast að tapa bestu flúðum landsins í virkjun Innlent Katrín gerir upp framboðið og safnar heitum Innlent Pétur Jökull hljóti að vera einstaklega óheppinn Innlent Þriggja daga heitavatnsleysi í næstu viku Innlent Segir verkfræðinga á villigötum Innlent Fleiri fréttir Sagði Pétri Jökli að skipta um síma í snarheitum Starfsfólk í áfalli og kynhlutlaus salerni á barnum Skjálfti af stærðinni 3,0 í Mýrdalsjökli en enginn órói Alma Mjöll ráðin til þingflokks VG Flugfélagið Ernir svipt flugrekstrarleyfi „Það er komið að skuldadögum“ Kvikusöfnun og landris enn á sama hraða Pétur Jökull hljóti að vera einstaklega óheppinn „Algjörlega mistekist að stýra efnahag landsins“ Íbúafundur um uppbyggingu sem ógni flúðunum skilyrði Leita ökumanns sem ók á stúlku og stakk af Meiri tíðindi að stjórnin hafi lifað svo lengi Pottur á eldavél talinn upptök brunans á Amtmannsstíg Láglaunakonur heilsuveilli en konur með hærri laun Krefst að lágmarki sex og hálfs árs fangelsis yfir Pétri Jökli Ójöfnuður meðal kvenna og ríkisstjórnin gagnrýnd Gagnrýnir tvískinnung borgaryfirvalda með orlofsgreiðslur Dags Þriggja daga heitavatnsleysi í næstu viku Tæknileg vandræði hjá Háskóla Íslands Hlé vegna gagna frá ChatGPT Sérsveitin kölluð til í Urriðaholti „Mér að mæta“ ef krossar yrðu fjarlægðir Segir verkfræðinga á villigötum Landsvirkjun gerir 725 milljón króna tilboð í Toppstöðina Skjálfti í Bárðarbunguöskjunni Óttast að tapa bestu flúðum landsins í virkjun Rauðu örvarnar leika listir sínar á Íslandi Apabóla geti komið til landsins en muni ekki verða útbreidd Katrín gerir upp framboðið og safnar heitum „Viðbrögð lögreglu óásættanleg“ eftir líkamsárás á Þjóðhátíð Sjá meira