Buss vill fá Jackson aftur

Jerry Buss eigandi Los Angeles Lakers hefur ekki gefið upp alla von í að lokka fyrrum þjálfara liðsins Phil Jackson til félagsins á ný og hafa þeir þegar átt viðræðufund saman. Jackson þykir ekki líklegur kandídat í að taka við starfinu á ný eftir að hafa farið ófögrum orðum um aðalstjörnu liðsins, Kobe Bryant í bók sem hann gaf út um síðasta tímabil sitt við þjálfun hjá Lakers, þegar liðið tapaði fyrir Detroit Pistons í úrslitum NBA í fyrra. Í bókinni segir hann að Bryant sé eigingjarn og óviðeigandi persónuleiki og því þykir ólíklegt að þeir vinni saman aftur, þó að leikmaðurinn hafi lýst yfir áhuga sínum á að leika aftur undir stjórn Jackson.