Þjálfar Jackson LeBron James?

Forráðamenn Cleveland Cavaliers í NBA-körfuboltanum staðfestu um helgina að þeir hefðu sett sig í samband við Phil Jackson, einn sigursælasta þjálfara í sögu NBA. Sögur herma að stjórn Cavaliers vilji fá Jackson til liðs við sig til að leiðbeina hinum unga og efnilega LeBron James sem margir vilja líkja við hinn eina sanna Michael Jordan. Jackson, sem gerði bæði Jordan og Kobe Bryant að NBA-meisturum, er eftirsóttur um þessar mundir og eru New York Knicks og Los Angeles Lakers einnig á höttunum eftir honum.