Hjálparforrit á vefsíðu Strætó

Í fréttatilkynningu frá Strætó bs. er bent á nýjan og endurbættan ráðgjafa sem hefur verið tekinn í notkun á vefsíðu Strætó bs. á slóðinni www.bus.is. Ráðgjafinn er öflugt hjálparforrit sem veitir nákvæmar upplýsingar um áfangastaði og ferðir strætó með það að markmiði veita aukna þjónustu og að koma notendum milli staða á höfuðborgarsvæðinu á sem hagkvæmastan hátt. Ráðgjafinn blasir við notendum þegar slóðin að vefsíðu Strætó bs. hefur verið slegin inn. Notandinn skráir inn brottfarar- og áfangastað í viðeigandi reiti, nákvæm heimilisföng eða brottfarar- og áfangastaði úr vallista. Þá er sleginn inn ákjósanlegur komutími á áfangastað og hvaða dag vikunnar á að ferðast. Þegar smellt er á hnappinn „Finna leiðir“ birtist leitarniðurstaða með allt að fjórum tillögum að ferðatilhögun. Besti kosturinn er efst. Með hverri tillögu eru krækjur þar sem skoða má kort og sjá strætóleiðirnar nánar.