Annar alvarlega slasaður

Tvítugur karlmaður slasaðist alvarlega fyrir utan skemmtistaðinn Pakkhúsið á þriðja tímanum aðfaranótt laugardagsins þegar þrítugur karlmaður sló hann í andlitið.

Maðurinn var fluttur á Sjúkrahús Suðurlands á Selfossi og var farið með hann þaðan á slysadeild Landspítala – háskólasjúkrahúss í Fossvogi í Reykjavík. Ekki hafa fengist upplýsingar um líðan mannsins.

Lögreglan á Selfossi vinnur nú að rannsókn málsins. Ekki er vitað hvað árásarmanninum gekk til.