Hrófatildur í Hyde Park

Breska blaðið Observer greindi frá því í fyrri viku að að fyrirhugaður skáli Ólafs Elíassonar og norska arkitektsins Ketils Thorsen við Serpentine-galleríið í London yrði ekki reistur sökum þess að þeir hefðu ekki staðist skilafrest á teikningum.

Í þeirra stað hefði íranski arkitektinn Zaha Hadid tekið að sér verkefnið og myndi skila því þann 11. júlí. „Við skulum kalla þessa frétt leiðinlegan misskilning," sagði Tom Coupe á kynningardeild safnsins sem stendur við samnefnda tjörn í Hyde Park. „Allar áætlanir standast og skálinn verður tilbúinn fyrir samkomu helstu fjárfesta okkar."

Ólafur og Ketill teiknuðu stóran skála við galleríið sem er skammt frá Royal Albert Hall og skyldi hann standa uppi tímabundið. Átti húsið að vera risið í ágústbyrjun og standa til loka nóvember. Er hugmynd þeirra sú að þar verði vinnustofa arkitekta og vísindamanna opin hvern föstudag. Atburðaskráin í skálanum endar á maraþonráðstefnu í tvo sólarhringa með hléum þar sem krufin yrði arkitektúr skynfæranna.

Ólafur er sem kunnugt er hönnuður á ytra byrði tónlistarhúss sem nú rís í Reykjavík. Hann er einnig í samvinnu við Hirshhorn-safnið í Washington um endurbætur á safninu til að auka þar aðsókn og vann hugmyndasamkeppni um viðbyggingu á ArOs-listasafninu glæsilega í Árósum.

Ketill vinnur á hinni heimskunnu arkitektastofu Snjóhettu og er aðalhöfundur nýja bókasafnsins í Alexandríu. Hann hefur unnið áður með Ólafi að hluta nýja óperuhússins í Osló sem nú er í byggingu.

Það er Íslandsvinurinn og sýningarstjórinn Hans Ulrich Obrist sem hefur umbylt nokkuð stefnu Serpentine. Hans er einn af sýningarstjórum þar og hefur getið sér gott orð sem slíkur víðar: hann skipulagði stóra sýningu bandarískra listamanna sem hér var fyrr í vetur og átti einnig hlut að stóru Kína-sýningunni - fyrsta hluta - sem var í Battersea-listamiðstöðinni á liðnu ári. Hans hefur átt í samstarfi við Eiðasetur og Ara Alexander kvikmyndahöfund, kom meðal annars að kvikmynd hans um Magnús Blöndal Jóhannsson.

Eins og sjá má á meðfylgjandi myndum er skálinn óvenjuleg smíð og geta lesendur Fréttablaðsins lagt leið sína út í Hyde Park og litið á bygginguna fram eftir hausti. Þar verður sýning Hreins Friðfinnssonar frá 18. júlí og þegar henni lýkur tekur þar við sýning á verkum Matthews Barney.

Misskilningur blaðamanns Observer kann að skapast af því að annað tímabundið mannvirki verður reist í Serpentine undir fjáröflunarhóf fyrir ríka fólkið sem gefur fé til rekstrar gallerísins þar sem það kemur saman og drekkur kampavín í sínu fínasta pússi.

Það er einhvers konar myndverk - innsetning er það kallað - eftir íranska arkitektinn og samstarfsmenn hennar. Hadid er mikil uppreisnarkona í heimi byggingarlista vesturálfu. Hún er fædd 1950 og hefur á liðnum árum hannað fjölda bygginga sem margar hafa ekki risið. Meðal þekktari verkefna hennar eru Vitra-slökkvistöðin í Sviss, Phaeno-vísindamiðstöðin í Wolfsburg fyrir Wolksvagen, og Rosenthal-listamiðstöðin í Cincinnati. Hún er nú að hanna sundlaugahöll fyrir Ólympíuleikana í London 2012.