Ökumaður svo drukkinn að ekki var hægt að taka skýrslu

Ökumaður, sem mældist á hátt í tvö hundruð kílómetra hraða á Vesturlandsvegi í nótt, reyndist svo drukkinn þegar hann náðist að ekki var hægt að taka af honum skýrslu. Hann var því vistaður í fangageymslu í nótt. Auk þess hafði hann áður verið sviptur ökuréttindum vegna ölvunaraksturs.

Lögreglumenn sáu hann koma á mikilli ferð upp úr Hvalfjarðargöngum og hófu eftirför. Þegar þeir voru á 150 kílómetra hraða höfðu þeir hvergi nærri við ökumanninum og var búið að senda lögreglulið til móts við manninn, þegar hann nam loks staðar við Álsnes, og var handtekinn.