Tvær líkamsárásir í nótt

Tvö líkamsárásarmál komu til kasta lögreglunnar á höfuðborgarsvæðinu í nótt. Í fyrra atvikinu réðst karlmaður á tvær ungar konur í Bankastræti og veitti þeim báðum áverka svo þær þurftu að komast undir læknishendur á Slysadeild.

Maðurinn var handtekinn og verður yfirheyrður í dag. Í því síðara handtók lögreglan mann sem hafði barið sambýliskonu sína utan við heimili þeirra. Hún þurfti líka að leita aðhlynningar á Slysadeild. Málin verða bæði rannsökuð í dag.