Hyggjast kæra yfirflug í morgun

„Við ætlum að kæra þá," segir Stefán Vagn Stefánsson, yfirlögregluþjónn á Sauðárkróki, um áhöfn flugvélar sem flaug lágflug yfir svæðinu þar sem ísbjörninn heldur sig skammt frá bænum Hrauni.

„Flugmálastjórn gefur út reglur um það til flugmanna að allt flug undir 5.000 fetum innan við sjö mílna radíus frá Hrauni á Skaga sé ólöglegt," sagði Stefán og bætti því við að þessar reglur hefðu verið settar í gær. Yfirflugið sem um er rætt átti sér stað klukkan tuttugu mínútur fyrir tíu í morgun og segist Stefán vita til þess að viðurlögin séu að minnsta kosti svipting flugleyfis og ef til vill einhver sekt að auki.