Kovalainen verður áfram hjá McLaren

Finnski ökuþórinn Heikki Kovalainen hefur náð samkomulagi við lið McLaren um að aka með liðinu á næsta tímabili. Finninn gekk í raðir liðsins fyrir keppnistímabilið og er sem stendur í sjötta sæti í keppni ökuþóra.

Samstarf Kovalainen og Lewis Hamilton hefur verið með ágætum og hefur hinn 26 ára gamli Kovalainen sýnt ágæta tilburði inn á milli. Hann náði til að mynda ráspól í breska kappakstrinum fyrr í þessum mánuði.