Eins og greint var frá í fréttum í gær hafði fána Tíbets verið komið fyrir á Hallgrímskirkjuturni í gærmorgun þegar starfsmenn komu til vinnu sinnar. Eins og meðfylgjandi myndir sýna var einnig kveikt á kyndli á toppi turnsins klukkan 23:45 þann áttunda ágúst, eða á föstudagskvöld.
Í tölvupósti sem barst Vísi fyrir stundu segir að aðgerðinni hafi verið ætlað að lýsa stuðningi við Tíbeta og mótmæla þeim mannréttindabrotum sem þeir búa við í heimalandi sínu. Þá segir einnig að þetta hafi verið í fyrsta skipti „leikmaður", eins og það er orðað, klífur Hallgrímskirkju.
Hið sama var uppi á teningnum víðs vegar um heiminn sama dag en þá var kveikt á rauðum kyndlum á fjallstoppum, skýjakljúfum og fleiri stöðum í öllum heimsálfum.
Nánar má lesa um aðgerðirnar hér.
