Rímaði við andrúmsloftið

Snorri Björnsson, fimmtán ára áhugaljósmyndari, á vetrarljósmyndina sem prýðir umslag sólóplötu Stefáns Hilmarssonar, Húm (söngvar um ástina og lífið), sem er væntanleg í búðir.

Stefán, sem er kunningi fjölskyldu Snorra, kom auga á myndina á ljósmyndasíðunni Flickr og heillaðist undir eins af henni. „Hún rímaði svolítið vel við andrúmsloftið sem er á plötunni,“ segir hann.

Fyrir síðustu jól efndi Fréttablaðið til könnunar um besta og versta plötuumslagið og var umslag jólaplötu Stefáns, Ein handa þér, valið það versta. „Mitt þótti ekkert sérstaklega frumlegt,“ rifjar Stefán upp og hlær. Hann vill ekki meina að slæmu dómarnir hafi fengið hann til að feta nýjar slóðir fyrir þessi jól. „Ég get ekki sagt að það hafi haft úrslitaáhrif. Platan er í rólegri kantinum en samt eru þetta engar vögguvísur. Svo er farið að rökkva á þessum tíma og ég var búinn að ákveða fyrirfram að platan ætti að heita annaðhvort Húm eða Rökkur,“ segir hann. „Svo varð þessi mynd á vegi mínum og ég talaði við Snorra og hann var alveg til í að lána mér hana.“

En gerir hann sér von um sigur í næstu Fréttablaðskönnun? „Ég geri mér engar vonir um það en við sjáum bara hvað setur. Ég er bara ánægður með þessa mynd og ekki síður ánægður með plötuna.“

Stefán byrjaði að undirbúa hana í fyrra áður en hann réðst í gerð jólaplötunnar. Á þessu ári byrjaði hann að safna til sín lögum og leitaði til helstu lagasmiða þjóðarinnar, þar á meðal Gunnars Þórðarsonar, Magnúsar Þórs Sigmundssonar og Jóhanns G. Jóhannssonar. „Ég var með 35 til 40 laga bunka sem ég vann úr. Útgangspunkturinn var að þetta yrðu frábær lög hvert og eitt og mér finnst það hafa tekist, en auðvitað þykir hverjum sinn fugl fagur.“ Stefán er sjálfur aðaltextahöfundur plötunnar auk þess sem Jóhann G., Aðalsteinn Ásbjörn Sigurðsson og Friðrik Sturluson koma þar við sögu.

freyr@frettabladid.is