Öllum 29 kínversku námumönnunum bjargað

Búið er að bjarga öllum 29 kínversku námumönnunum sem lokuðust inn í námu í Sichuan héraði á laugardag eftir að það flæddi inn í hana.

Það tók björgunarmenn um 30 klukkustundir að komast að námumönnunum en eftir að það tókst leið aðeins klukkutími þar til þeir allir voru komnir upp á yfirborðið og á leið á spítala.

Margir þeirra eru mjög þrekaðir eftir vistina í námunni enda munu aðstæður hafa verið erfiðar þar sem náman hálffylltist af vatni. Námuslys eru algeng í Kína en á síðasta ári fórust rúmlega 2.600 manns í þeim.