Framtakssjóður Íslands hefur keypt eignarhaldsfélagið Vestia af Landsbankanum. Um sex þúsund manns starfa hjá þeim sjö félögum sem fylgja Vestia til Framtakssjóðs Íslands.
Fyrirtækin sem fylgja með í kaupunum eru:
Icelandic sem áður hét SH og er alþjóðlegt sjávarútvegsfyrirtæki með samtals 30 dótturfélög og starfsemi í 14 löndum.
Teymi sem rekur Vodafone, Skýrr, EJS og HugurAx.
Húsasmiðjan sem er blóma- og byggingavöruverslun
Plastprent sem er leiðandi fyrirtæki í framleiðslu plastumbúða og plastfilma.
Framtakssjóður Íslands greiðir Landsbankanum samkvæmt samkomulaginu 19,5 milljarða króna fyrir Vestia. Landsbankinn mun jafnframt eignast 30% hlut í sjóðnum. Hlutafé Framtakssjóðsins verður væntanlega tvöfaldað úr 30 milljörðum króna í 60 milljarða króna. Samkomulagið er með fyrirvara um niðurstöður áreiðanleikakannana og samþykki Samkeppniseftirlitsins.
Sameiginlegt markmið bankans og sjóðsins er endurreisn íslensks atvinnulífs og telja forsvarsmenn samningsaðila kaupin mikilvægt skref á þeirri leið. Framtakssjóður Íslands er sjóður í eigu sextán lífeyrissjóða innan vébanda Landssambands lífeyrissjóða og hlutverk hans er að taka þátt í og móta endurreisn atvinnulífsins.
Fyrir Landsbankann eru þessi kaup mikilvægt skref meðal annars með tilliti til samkeppnissjónarmiða þar sem eignarhald bankans á stórum fyrirtækjum var tímabundin neyðarráðstöfun vegna erfiðra aðstæðna í íslensku efnahagslífi.
