Amy og Blake aftur upp að altarinu

Amy Winehouse er að plana að giftast gamla kærastanum Blake Fielder-Civil á ný í Las Vegas. Turtildúfurnar voru gefnar saman í Miami árið 2007 en stuttu seinna var Blake handtekinn fyrir líkamsárás og dæmdur í 27 mánaða fangelsi.

Á síðasta ári skildu hjónin þegar upp komst um framhjáhald söngspírunnar en eftir að Blake losnaði úr fangelsinu og fór í meðferð endurnýjaði parið kynnin og í þetta sinn eru þau fullviss um að dæmið gangi upp.

Að sögn heimildarmanns The Sun úr innsta hring Amy vill hún giftast í Vegas í þetta skiptið því að hennar mati gæti það verið slæmur fyrirboði að endurtaka leikinn í Miami.

Amy var einnig að splæsa í 2,6 milljóna punda íbúð í Camden hverfinu í London og ætlar Blake að flytja inn til hennar, um leið og hann losnar úr meðferð.