Afmæli Danadrottningar í uppnámi vegna eldgossins

"Við lokum á alla, líka þá með blátt blóð í æðum," segir Søren Hedegaard Nielsen, upplýsingafulltrúi Kastrup-flugvallar í Kaupmannahöfn.

Mikil hátíðarhöld eru skipulögð vegna sjötugsafmælis Margrétar Þórhildar Danadrottningar. Þau standa alla vikuna og áttu að ná hámarki með veislu í Konungshöllinni annað kvöld og hefur fyrirfólki víða að verið boðið.

Allt útlit er fyrir að gestalistinn eigi eftir að taka stakkaskiptum þar sem Kastrup-flugvelli hefur verið lokað vegna öskunnar frá eldgosinu í Eyjafjallajökli. Flestir gestanna ætluðu að fljúga til borgarinnar á morgun.

Sænsku og norsku konungsfjölskyldurnar taka væntanlega lestina yfir Eyrarsundið en það er ekki víst að aðrir gestir fari sömu leið.

Forsetahjónin íslensku eru meðal gesta sem boðið var í veisluna. Dorrit er mætt til Danmerkur en Ólafur Ragnar er staddur í London.