Patreksfirðingar sjósettu nýjan bát

Nýr bátur var sjósettur á Patreksfirði á sunnudaginn. Báturinn heitir Fönix BA - 123 og er 15  brúttótonn.  Skelin var keypt hjá Bátasmiðju Guðmundar í Hafnarfirði en smíði hans var fullkláruð á Patreksfirði í vetur, samkvæmt upplýsingum frá Atvinnuþróunarfélagi Vestfjarða.

Eigandi bátsins er Hafþór Jónsson útgerðarmaður á Patreksfirði. Hafþór reiknar með að báturinn fari sína fyrstu veiðiferð á grásleppuna núna á komandi vertíð. Ætlunin er í framhaldinu að gera hann út á línuveiðar.