Vilhjálmur prins á að mæta í vinnu sína í dag

Breski flugherinn gerir ráð fyrir því að Wilhjálmur prins snúi aftur til vinnu sinnar í dag.

Prinsinn starfar nú sem þyrluflugmaður í björgunarsveit flughersins sem staðsett er í Wales. Í frétt um málið í Guardian er haft eftir yfirmanni sveitarinnar að þetta verði hefðbundinn vinnudagur fyrir prinsinn og að ekkert sérstak sé áformað eftir brúðkaup prinsins og Katrínar Middleton.

Samkvæmt fréttinni komu þau hjónin Vilhjálmur og Katrín til hýbýla sinna í Wales í gærkvöldi svo prinsinn kæmist í vinnuna á réttum tíma. Hveitibrauðsdagar þeirra hafa því verið nokkuð snubbóttir.