Olían á svipuðu róli og í mars

Heimsmarkaðsverð á hráolíu féll, þegar mest var, um 8,2 prósent á bandarískum fjármálamörkuðum í gær í kjölfar gengisstyrkingar Bandaríkjadals.

Olíuverðið fór undir hundrað dali á tunnu og hefur það ekki verið lægra síðan í mars. Hátt olíuverð hefur dregið mjög úr eftirspurn eftir eldsneyti vestra, að sögn Bloomberg-fréttastofunnar.

Svipuð þróun var á verði annarrar hrávöru, svo sem silfurs, sem lækkaði um 8,4 prósent. Silfurverðið hefur nú lækkað um tæp þrjátíu prósent frá í apríl.- jab