Ræningjarnir enn ófundnir

Ræningjarnir þrír, sem létu greipar sópa um úraverslum Michelsen við Laugaveg í  Reykjavík í gærmorgun eru enn ófundnir, eftir því sem fréttastofan kemst næst.

Rannsóknardeild lögreglunnar verst nánari frétta. Starfsmenn verslunarinnar telja að skoti hafi verið hleypt af þar innandyra, en ekki liggja fyrir óyggjandi ummerki eftir það.

Landamæragæsla á Keflavíkurflugvelli var hert strax eftir ránið en það hefur ekki skilað árangri, eftir því sem best er vitað.