Aðstoðarmönnum ráðherra verður fjölgað, samkvæmt nýju frumvarpi um stjórnarráðið sem samþykkt var í ríkisstjórn í morgun. Í fréttatilkynningu frá ráðuneytinu segir að þetta sé gert til að efla stefnumótun í ráðuneytum. Auk aðstoðarmannsins sem ráðherra hefur nú þegar heimild til að ráða sér muni ráðherra geta ráðið sérstakan ráðgjafa án auglýsingar.
„Um ráðgjafa ráðherra gildir sama regla og um aðstoðarmann ráðherra að hann gegnir störfum svo lengi sem ráðherra ákveður, en þó ekki lengur en ráðherrann sjálfur. Vegna aðhalds í rekstri ráðuneyta er þó ekki gert ráð fyrir að þessi heimild taki gildi fyrr en að afloknum næstu alþingiskosningum," segir í tilkynningu frá forsætisráðuneytinu.
Stjórnarráðsfrumvarpið hefur verið sent þingflokkum stjórnarflokkanna til umfjöllunar og afgreiðslu.
